Banner
Мое ќоше

Сега сите го сакаат Прибе

pribe

Никола Груевски не додржа, ниту еден ден, да ги препушти најавените реформи на владата за демократизација на Македонија. Веднаш обзнани дека ВМРО-ДПМНЕ ќе ги спроведе во целост и Извештајот и препораките на Герхард Прибе за излез од кризата прифатени од сите политички партии уште лани во јуни, а кои станаа составен дел и на договорот од Пржино. Наеднаш, сите се сетија на маргинализираниот и подзаборавен обемен труд на Прибе кој стана најнов политички хит и на власта и на опозицијата и на Владата и на медиумите, а набргу и на парламентот. На нормален човек просто не му преостанува ништо, освен да врисне – а бре идиоти, што правевте цела година.

Сега на власта и лично на Груевски полна им е устата со истражувањата на големиот искусен експертски тим на педантниот Германец за ситуацијата во државата и нивните прецизно нотирани излезни решенија кои длабоко задираат во системските прашања за владеење на правото и демократијата, со други зборови, за почеток на европеизацијата на Македонија. Така во земјата почнува најновата фаза на долгогодишната криза со голема лицемерна ѓурултија и кавга кој повеќе го сака Прибе чиј извештај воскресна по една година и стана реформски пакет на ВМРО- ДПМНЕ и на Груевски. Дали можете да поверувате во вакво нешто што ги надминува рамките и на најгруба навреда на јавноста. И покрај тоа, би сакал да верувам дека во високите ешалони на ВМРО-ДПМНЕ почнува да преовладува сознанието дека не треба да се погреба партијата заедно со падот на Груевски и дека одолговлекувањето на вистинските решенија ги става и партијата како и цела Македонија во заложништво. Сакам да верувам, ама не можам затоа што сите аргументи зборуваат дека се работи за нова голема лага и измама на јавноста и купување на време работите да се забошотуваат до есен до кога треба да бидат исполнети сите предуслови за слободни избори кои треба да се одржат во октомври, или најдоцна во ноември.

Груевски мами со Извештајот на Прибе ѓоа преточен во реформи. Еве ги фактите: неможно е тој што ја втурнал земјата во криза и тој што перманентно ја нарушува стабилноста на државата со укинување на владеењето на правото, тој што ја попречува правдата и го контролира судството во сите инстанции, тој што воведува строга воена цензура, ги корумпира медиумите, тој што е осомничен за злосторничко здружување за изборен криминал, за нелегитимно приграбување на власта, за организиран криминал и други тешки кршења на законите, да ја извлече земјата од длабоката политичка и морална криза. Кажано народски, тој што не’ втурна до гуша во кал заедно со себеси не може да не’ извлече од калта.

Ако Груевски седне да го прочита Извештајот на Прибе и ако го разбере, а нема причина да не го разбере, бидејќи е многу едноставно напишан за возраст од 18 до 88 години, ќе му се крене косата на глава на колку места ќе се препознае како најголем причинител на кризата и дестабилизацијата на Македонија. Ако на тоа го додаде и договорот од Пржино за кој, исто така, велат и Американците и ЕУ дека само што не воскреснал, тогаш веројатно конечно ќе научи дека за вкупните состојби во државата е најодговорен тој и неговите влади цела една деценија, а и денес е исто толку одговорна и Владата која само формално работи без него и која е вмровска творба на она што требаше да биде предизборна коалициска влада за да спроведе слободни избори. Наместо тоа, добивме уличарска местенка на промена на суштината на Уставот експресно давајќи му право на претседателот Иванов да ја попречува правдата со аболиции за осомничените да не седнат на обвинителна клупа, сведоците да не можат да сведочат, а политичките противници да бидат изложени на закани и голем ризик дека ќе бидат неправедно осудени од судовите кои се под строга контрола на власта.

Тоа е резултатот на аболициите на претседателот на државата кои нарачани од естаблишментот на ВМРО-ДПМНЕ предизвикаа невидена какофонија во целата држава и потсмев во светот. Демек прво аболиција на вмровскиот врв, па на опозицијата, па на сведоците и на јавни личности кои не се под никаква истрага. Се’ во исти кош. Кога се виде дека помилувањето на највисоките функционери и министри значи признавање на вината, претседателот ја поништи аболицијата божем само за политички експонираните, за на крај инфантилно да порача дека тие што не сакаат да бидат аболирани да му напишат писмо. Ајде сега оди ти објасни му на некој, дури и на Балканот, дека еден претседател за да ја спречи правдата дава аболиција на осомничени функционери, на сведоци и на недолжни граѓани, потоа ја селектира својата сопствена аболиција според политички, а не правни критериуми, за на крај претставата да заврши со детска логика – кој не сака милост нека каже, а после претседателот пак ќе размисли што да прави. Целата оваа конфузија во државата претседателот ја направил, по сопствено признание, со намера да предизвика помирување меѓу раскараните лидери и за излез од кризата. Па ако е така, сега кога виде дека нема помирување и дека кризата се продлабочи и дека никој не ја сака неговата амнестија, редно е да си замине од политиката по еден таков дебакл. Ама за таков чекор треба да се има и образ и намуз.

Што се однесува до најновиот пакет на Владата и на ВМРО-ДПМНЕ за демократизација на државата по урнекот на Герхард Прибе, еве неколку препораки во кои недостасува само сликата на виновниците: групата експерти беше фокусирана на она што се појави како области каде што се најпотребни мерки за следење на тековната кризна состојба. Значајни недостатоци беа идентификувани главно во пет сфери: следење на комуникациите, судството и обвинителството, надворешниот надзор од независни тела, изборите и медиумите. Во Извештајот има прецизни препораки со специфични рокови имајќи ја предвид потребата за итно постапување во сите области кои треба да бидат имплементирани во практиката без одлагање. Тоа се, пред се’, европските вредности: демократија, еднаквост и почитување на човековите права, владеење на правото кои се темели врз кои е основана ЕУ. Прибе во своите препораки ни пишува: гарантирањето на слободата на медиумите, како и борбата со корупцијата треба да бидат сметани за највисоки цели во секоја од набројаните пет сфери. Проблемите кои се идентификувани во овој Извештај се поврзани и нема да бидат надминати додека не се потенцираат сите недостатоци кои го попречуваат функционирањето на парламентарната демократија. Интересот на политичките партии не треба да се меша со јавниот интерес на државата.

Прибе е дециден: „скандалот со прислушувањето откри масовно прекршување на основните права, вклучувајќи го и правото на глас, правото на еднаков пристап до јавни услуги, правото на приватност и заштита на личните податоци, како и правото на независно и непристрасно судење. Снимките од разговорите, според квалитетот, опсегот и бројноста, потврдуваат дека се направени во просториите на националната разузнавачка служба. Според надворешен набљудувач, УБК работи надвор од својот законски мандат во име на власта за да ги контролира носителите на високи функции во јавната администрација, обвинителството, судиите и политичките противници, на што како последица се вмешува во независноста на судството и другите национални институции. Очигледна е директна вмешаност на високи владини и партиски функционери во нелегални активности, вклучително и изборни измами, корупција, злоупотреба на власта и овластувања, конфликт на интереси, уцени, изнудување, притисок врз вработени во јавниот сектор да гласаат за одредена партија со закана за нивно отпуштање, тешки прекршувања на процедурите за јавни набавки со добивање недозволен профит, непотизам и протекции, неприфатливо политичко мешање во назначување на судии, како и мешање во други наводно независни институции поради лична, или партиска корист…“ итн. итн. итн. стои документирано во Извештајот на толку саканиот Прибе. Дали можете да препознаете кој сето ова зло го направи и да погодите кој тоа треба да го исправи.

Ете затоа велам дека не се можни ни реформи, а не може да ни помогне ни Прибе. Наводните реформи се уште една голема измама. Само непристрасен специјален суд и обвинителни акти со цврсти докази на специјалните обвинители можат да означат крај на режимот на Груевски.

(Објавено во Утрински)

Коментирај:

коментари:

Овој текст има еден коментар

  1. aco spaseski

    Zagrizenosta e objektivna,
    Kako mozni opcii sigurno ima poveke, megjutoa citajki go tekstot, mi se sozdade edno viduvanje, koe ke se obidam da go objasnam.
    Smetam deka masinerijata uvide deka ne moze da se pobedi izvestajot na Pribe so konfrotacija. Na site polinja pocna da se osekja slabosta i gubenjeto na pozicijata, pa pordi toa najverovatno se odlucija da ja promenat taktikata, da ne se konfrontiraat protiv izvestajot na Pribe navidum da go podrzat izvestajot i da ja primenaa taktikata od konfrontacija vo pridruzi im se od kade e podobro da se dejstvuva.
    So ovaa taktika sakaat da se zadskrijat pozadi izvestajot od Pribe, istiot da go masakriraat, vidoizmenat i prilagodat vo nivna korist. Ova se prevzema zato sto celiot narod ne go ima procitano izvestajot na Pribe, nie kako narod povekje se sluzime so preraskazuvanje od usta na uvo, so razni dodavki i ukrasi vo zavisnost od raskazuvacot, taka na krajniot slusatel nema da mu e jasno sto rekol Pribe vo izvestajot.
    Se postavuva prasanje komu ke mu veruvame i vo sto da veruvame?
    Vo osnova site ke veruvaat vo izvestajot na Pribe, site ke se falat deka go sproveduvaat izvestajot, a seto ova ke se svedi na slednoto; sekoj ke go tumaci onaka kako toj saka, a najpoveke ke dominira od kogo e kazano. Znaci ke mu veruvame na toj sto ni e simpaticen. I dokolku vo prikaznata se naglasi deka toa go kazal liderot deka toa go znaes od bliski izvori do liderot ili go izjavil na javen nastap, e toa e ona sto treba ostanatite da go prifatat , ke go branat istiot stav bez proverka i bez kritotika, do psledna kapka krv i toa ke bide edinsvenata vistina za niv.
    Dokolku nekoj se obide da go kritikuva, vednas ke bide osuden od site megafoni, i tradicionalni braniteli na (oblandite i livantoto)* od vladetelot I vlasta, minata segasna i idna. Poltron sie poltron, dupe lizec e stalno dupelizec, uvlakac e stalno uvlakc I nema dovolno mesto za site pofalni zborovi koi mozeme da gi napiseme.
    Ne smee da se zaborava i ignorira koj niv gi plakja?
    Treba da se znae deka niv gi plakja vlasta i toa debelo so narodni pari , so pari od siromasnite koi plakjaat redovno danoci i globi-kazni, zatoa sto se cesni i cestiti, ja sakaat svojata drzava Makedonija. Dokolku nema pari vo budzetot site drzavni firmi izmislija finti, so amin na vlasta, za zaostanat dolg od pred nekoja si godina i onie sto ne vodele evidencija ke si platat nekoja iljadarka, a dokolku ne platat ke platat destina iljadarki za advokat, notar, izvrsitel, blokiranje i odblokiranje na smetka so iljada nervozi I posledici po zdravjeto.
    Vaka ova vlast go saka narodot i vo nego se kolne toj da plakja, a vlasta da krade toa e dobar narod, takov narod saka sekoja vlast i vlastodrzec.
    Ova nesmee da se podceni po podatocite od Chavkov imame 2.400.000 ziteli, podeleno na 4 clena = 600.000 domakinstva, da odzememe 50% koi se redovni pla]aci, ostanuvaat 300.000 domakinstva po 20 evra =6.000.000,00 evra ili so zborovi sesmilioni evra. I dokolku matematikava vi e neverojatna isfrlite uste 50% ili polovina, sepak od edna mala navidum akcija, drzavata od narodot zema 3.000.000 evra. Ovaa presmetka e dokolku vednas ja platite smetkata vo sprotivno citajte 30 milioni evra..
    I sega dodadeta se ona sto go imate doziveano Vie, miljardi m2 privatizadij, miljardi m2 dencionalizacija, miljardi m2 legaliziranje na divo izgradeni objekti I toa za samo 1 evro/m2, e toa se mnogu miljardi evra, i ke viditi od kade se parite vo Belize i vo ostanatite destnacii za perenje pari. Ni ja preprodadoa sopastvena zemja koja ni e amanet od dedo pradedo. Za ova i drugo nekoj ke treba da dade octet a bogami I da odgovara.
    Najeksplatirana izjava ke bide deka tie se sorosoidi. Megjutoa vrz osnova na informaciite od vlasta deka SOROS debelo gi plakja, taka narecenite sorosoidi i toa so milioni evra, vladata vednas na SOROS da mu dade priznanie za najuspesen stranski investitor, bidejki investira vo Makedonija. A onie koi Verovatno so tie pari egzistirat se del od mladite koi se ostanati vo drzavava, a ne se podrzuvaci na vlasta. Doklku vlasta saka site pametni i inventivni mladi lugje da ja napustat drzavava, a da ostanat onie nivnite so neznam kakvi i od kade diplomi i nepreceno da napreduvaat vo drzavata-ni, togas mozat da se razbere zasto se odnesuvaat taka, Znaci sakat da ja unistat Makedonija i se sto e Makedonsko.
    So unistuvanjeto na demokratijata ke se unisti Makedonija, ke ostane ednoumie sto najverovatno tie toa i go sakaat, da ja raznebitat I osiromasat drzavava za da mozat nivnite mentori od stranstvo polesno da ja okupiraat Makedonija i teritorialno ili da ja podelat. Komu ova opcija mu odgovara sekoj moze da predvidi.
    Poradi toa mora da se vnimava od site aspekti zosto se zavrtija i zastanaa pozadi izvestajot na Pribe. Ova e samo edna variant, sigurno ima mnogu povekje, bidejki momentov e totalno neprdvidliv i ne se znae koj sto ke prevzeme.
    *oblanda i livanto –
    oblanda e slatko od kori i fil, a livanto e ime za site vrsti parfem i
    prijatni mirisi.
    p.s.Ova e vistinskoto tolkuvanje na zborovite, no do kolku nekoj insistira deka izmetot na negovit liderot e oblanda a urinata e livanto , zamoligo sam da si j… i da si se mackaat so istomislenicite i neka uzivaat zaedno, a onie koi gledaat so svoi oci, slusaat so svoi usi i sto razmisluvaat so svoja glava, da ne ostavat namira bidejke na nas strasno ni smrdi na kriminal .

Leave a Reply

Your email address will not be published. Required fields are marked *