Беше вистинско уживање да се јаде бурек цел викенд и да се слушнат малите тајни на големите мајстори од кујната на Владата
Се изнајадовме два дена бадијала колку ти душа сака тепсии и тепсии бурек, што ни ги измесија премиерот и еден фурнаџија од забавната рубрика на ТВ Сител . Беше тоа вистинско уживање да се слушаат малите тајни на големите мајстори директно од кујната на Владата. Цел викенд џвакавме, преџвакувавме, преживавме со сладострастие разни буреци: со урда и со сирење, со праз и со кисела зелка, со компири и со тиква, со маслинки и со месо… сето тоа добро залиено со јогурт и со маштеница. Со голема радост и со солзи на очите од смеење разбравме дека во државата нема никакви проблеми и дека се’ е под контрола на будната власт.
Двајцата извонредни соговорници, ем врвни готвачи ем големи оратори, добри пријатели, одамна на „Ти“, со оклагии во рацете ни сукаа ориентални специјалитети со слатки зборови и пикантни зачини.
Меѓу две пити бурек слушнавме дека немало штрајк во образованието. Во 90 отсто од училиштата наставата се одвива редовно и без никакви пречки. Децата си одат на школо радосни и жедни за нови знаења. Само до пред неколку дена во синдикатот на просветните работници биле одушевени од грижата на Владата кон учителите и наставниците и наеднаш, што се вели преку ноќ, незадоволство. Премиерот озарен ни ја откри вистината. Синдикатот во образованието, СОНК, имал избори. Замислете овие синдикални функционери колку биле глупави и не го почувствувале расположението на своите избирачи. Наместо да ја фалат Владата колку им е добро и да бидат избрани со 90 отсто гласови од сите што ја поддржуваат мудрата политика на власта, тие одлучиле со штрајк на презадоволни просветари да ја освојат синдикалната власт. Не ви е јасно како тоа сите се задоволни од Владата, а сакаат да победат на избори со штрајк против Владата со гласови на тие бедни 10 отсто незадоволници. Ако и натаму не ви е јасно, ќе ви се разјасни кога истражувачките новинари на ВМРО-ДПМНЕ и на Владата ќе ви откријат дека во синдикалната каса недостасуваат милиони денари од членарината на членството. Лисиците и камерите се подготвени ако лидерот на синдикатите и натаму аздисува и повикува на штрајк меѓу среќните учители.
Со широка насмевка и со сукалото во раце, премиерот по стоти пат овие два месеца пак поентира: ви се молам како можат да протестираат студенти против државен испит кога нема да го полагаат. Ќе си протестираат тие што ќе полагаат кога ќе им дојде редот по некоја година, дотогаш ќе научат по нешто за една шестка. Нема место за загриженост бидејќи веќе оваа пролет ќе има нов пакет-закони, 17. по ред во образованието , па така ќе си дојде се’ на свое место. Овие што сега студираат ќе ги пуштиме низ вода без државен испит, па зашто би се бунеле за тие што доаѓаат. Многу добра логика. Нели? Автономијата на универзитетот, апелите, отворените писма и протестите на 500 универзитетски професори тоа се заблуди наметнати од непријателите на татковината, од слабата опозиција која нема идеи како да го подобри уште повеќе квалитетот на владеење на Владата.
Случајот Кежаровски, бурекџиите, го објаснија маестрално. Па законот по кој е осуден Кежаровски го донесе СДСМ. Легалистичката Влада, која не сака да се меша во работата на судовите и на медиумите само е нем посматрач на спроведување на законот. Поради почитување на законите на СДСМ и независноста на судството дојде до една ваква конфузна ситуација.
Тоа што две години не се мрдна со мал прст да се усогласи и овој закон со европското законодавство, кое произлегува од обврските што сме ги потпишале како држава, тоа не игра никаква улога, а уште помалку што кога Кежаровски пишувал за случајот на монтираниот судски процес со полициски сведок пред шест години, нема ниту еден писмен документ дека сведокот бил заштитен, а уште помалку е важно што тој признал на суд дека бил под загроза на полицијата лажно да сведочи. Крунски аргумент дека власта нема ништо лично против Кежаровски е фактот што премиерот воопшто не го познава. Првпат чул за Кежаровски кога го уапсиле. Исто како и јас што немам ништо лично против Владата, иако повеќе од половина министри не ги познавам и не сум чул за нив додека не станаа министри.
Главниот десерт пекарите на бурек го сервираа кога премиерот откри во што е клучниот проблем на државата. Се работи за една мала група несреќници и неранимајковци кои се полни со омраза и ја трујат јавноста. Тоа се луѓе за жалење кои својата невидена омраза и нетрпеливост кон се’ што е добро во земјата ја претвораат во деструкција со своите јавни настапи и текстови. Тоа се болни умови кои премиерот не знае како можат да спијат мирно со својата нечиста совест. Треба да се сфати дека тоа се добро познатите малкумина платеници, предавници и кодоши. Тоа е таа мала група, која секој ден станува се’ поголема.
Премиерот и овојпат не одговори на прашањето како таа иста мала група, барем 90 отсто од нив, кога тој беше во опозиција беше професионална, пишуваше и зборуваше јавно извонредно добро. Дали тој ги плаќаше или и тогаш беа странски платеници. А, зошто да одговори кога бурекџијата не го ни праша, туку ептен патриотски кимаше со глава.


