
Нема да не’ убие пресилниот збор. Тоа е јамката околу вратот на чувствителните и достоинствените личности кои ги боли неправдата, навредата, клеветата. Нас, преостанатите во земјата безнадежија тоа не не’ допира. На тоа отрпнавме и навикнавме како на редовна доза апчиња, како канибалите на човечко, тазе заклано. Нас колективно ќе не’ уништи вербата во лагата која ја прифативме како вистина, неправдата како правда, ропството како слобода, тортурата како демократија и сиромаштвото како богатство. И наместо од тој кукавичлак да се срамиме – се гордееме. Наместо да им удриме клоца на арамиите да заминат таму кај што им е местото на обвинителна клупа, ги оставивме да ја водат државата и кога изборните резултати налагаат легална и мирна смена на власта.
Си велам, добро овие наши луѓе ги гледаат ли комшиите во Албанија што и како тоа го бараат од власта. Или и таму протестите ги организирал Џорџ Сорос. Го гледаат ли бунтот во Романија, или и таму Сорос ја подрива власта. Сите деспоти, властодршци и корумпирани политичари на Балканот и во Источна Европа имаат по еден Сорос со чија помош ги кројат лагите за големите заговори на непријателите против татковината. На сметка на лагите и примитивниот популизам со измислените непријатели и предавници го месат како тесто народот кој не го вадат од уста. За голема среќа имаат се’ помалку тесто, па затоа им требаат се’ поголеми лаги.
Еве да се обидеме да разобличиме само една од последните актуелни големи лаги кои се’ уште наидуваат на плодна почва и верба на слепо кај со години и години прелажаните граѓани. Една од тие големи ујдурми е ѓоа опасноста дека сите ќе мораме да зборуваме на албански. Албанскиот јазик ќе стане задолжителен на целата територија на Македонија. Луѓето во Прилеп, Кочани, Струмица, Гевгелија… во цела Македонија ќе мора да научат да зборуваат албански. Ајде сега оди зборувај за големите идеали и промени за подобра иднина, кога оваа будалштина со јазикот може да помине не само кај шовинистите, туку и кај граѓани кои ги поддржуваат промените и европеизацијата на Македонија.
Не се потребни високоумни стратегии за да се разбере дека со закон на се учи јазик. Ако можеше така да се научат јазици со директиви, тогаш сите во Македонија ќе знаевме по неколку светски и балкански јазици. Ако ништо друго, ќе научевме и македонски јазик како што треба и како што е редот и како што налагаат правилата, а не во парламентот, во институциите на државата, во судовите, на телевизиите, на социјалните мрежи и во весниците да читаме, пишуваме и слушаме јазик од кој болат ушите и очите. Затоа можеби во овој момент треба за сите големи патриоти да се воведе екстерно оценување за познавање на мајчиниот јазик.
Што мислите колку од загрижените за одбрана на македонскиот јазик од поалбанчување ќе паднат на испит. Ценејќи ги грешките од нивните јавни настапи не ќе може да го положи испитот ниту еден. Партискиот врв на ВМРО-ДПМНЕ се претставува себеси како најголем бранител на македонскиот јазик, ама никогаш не се огради од јавните навреди на Блаже Конески, творецот на литературниот македонски јазик, најзначајната фигура во културата на Македонија кој беше нарекуван јавно џуџето од Небрегово и Коњевиќ. Антонио Милошоски по тие изречени навреди, никогаш не се извини, а и ден денес е главен идеолог во врвот на ВМРО-ДПМНЕ. Ваква навреда на гиганти во македонската култура, литература и наука би значело крај на политичкото дејствување не само на тој што го изустил тоа, туку и на таа партија со таква идеологија. Државотворен народ никогаш нема да прифати такви изроди кои јавно ги навредуваат големите национални дејци како влезница за напредување во партијата. За жал, тоа кај нас се’ уште поминува.
Деновиве уште еден новопечен идеолог на ВМРО-ДПМНЕ нов првоборец во битката за десороизација на Македонија исфрли уште една тешка навреда, овој пат за „џуџето од Велес“ за основачот на современата македонска поезија великанот Коста Рацин, кој пишувал и творел на македонски јазик кога тој навистина бил забранет и кога навистина било големо херојство да се пишува на македонски. Извесен Цветин Чилиманов како следбеник на Милошоски во Рацин открива џуџе кое добро што загинало, ако останало живо ќе бил комунистички диктатор, или кодош како Славко Јаневски, човекот што го напиша првиот роман на македонски јазик. Се разбира на овие грандиозни личности од историјата на Македонија не им е потребна ниту мојата, ниту чија било одбрана, особено не од маргинални ебиветри и шарлатани… но молкот на нивната матица во ВМРО-ДПМНЕ сериозно загрижува. Затоа е неопходно да се изнесат на виделина лажните заштитници на македонскиот јазик и идентитет. Први треба да рипнат писателските организации и писателите, потоа Академија на науките и уметностите, универзитетите, актерите и театрите, институтите за грижа за јазикот сите тие покрај рефератите за годишнините од формирањето и големите дострели во културата, науката и творештвото треба многу похрабро и поконкретно да ги разоткријат центрите и мотивите на носителите на оваа демакедонизација продуцирана од пазувите на лажната најмакедонска партија.
Значи прво треба да се одбрани македонскиот јазик од Македонците. Тој не е загрозен ни од албанскиот, ниту од кој било друг јазик кој се зборува кај нас и во светот. Македонскиот јазик е комуникациски код во Македонија, јазик на кој сите што живеат тука се разберат меѓу себе. Поголемата примена на јазиците на другите народи што живеат во Македонија не загрозува никој и никого не принудува да ги научи сите. Животот, образованието, културата и интересите се „законите“ кои ги тераат луѓето да знаат што повеќе јазици. Низ годините запознав многу луѓе кои зборуваат повеќе јазици и се уверив дека е вистина поговорката колку јазици знаеш толку луѓе вредиш. Тоа редовно им го кажувам на младите новинари дека англискиот за нивната работа е задолжителен, ама во комбинација со неколку балкански јазици вреди многу повеќе. Конечно, дали ќе ви пречи ако вашите деца покарај мајчиниот јазик добро знаат англиски, или француски, или германски во комбинација со српски, албански, хрватски, бугарски, турски, грчки, влашки, ромски, бошњачки, црногорски…
Кардинали, последен час е да пуштите бел дим оти никој не ви го разбира јазикот на кој молчите.
(Објавено во Утрински)

