
Власта презема нова серија активности за да ја принуди опозицијата да ги бојкотира изборите. Бившиот премиер Груевски најмногу сакал избори без опозиција, така победатa му била најсигурна, башка ќе нема сомнeвања за фалсификати и се’ ќе протече во најдобар ред. Од такви избори без учество на опозицијата бил одушевен и еврокомесарот Јоханес Хан кој многу цивилизациски, културно и мудро кажа деновиве во едно интервју дека не е важно кој ќе учествува и кој нема да учествува на изборите во Македонија, важно е тие да бидат фер. Новите европски вредности на избори без опозиција Хан ги промовираше во софиско списание. Хан како Мао Це Тунг вели дека не е важно дали мачката е црна или бела, важно е да лови глувци.
Ваквата отворена поддршка на режимот на Груевски предизвикува нов уште пожесток хаос на домашната јавна сцена и се’ поперфидна и поподмолна манипулација со јавноста. Од една страна се повикува на избори со гаранција дека ќе се исполнат сите точки од договорот во Пржино, а од друга страна, се’ што може да води кон фер и слободни избори веднаш се проблематизира. На удар пак се Катица Јанева, натамошното комплицирање со избирачките списоци со нови барања и уште посилната контрола и притисоци врз медиумите. Специјалната обвинителка Груевски ја прозва во својот последен милитантен и популистички говор пред жените на ВМРО- ДПМНЕ како непријател број еден и фактор за дестабилизација на државата. Само дваесетина дена пред тоа, во новогодишното обраќање Груевски гарантираше, кој знае по којпат, дека ќе и’ бидат обезбедени на Јанева сите предуслови за непречена работа. Ете сега видовме што Груевски подразбира под непречена работа, тоа било да ја препушти Јанева противзаконски и противуставно во надлежност на јавните обвинители на сослушување како пред преки суд и пред стрелечки строј без право на одбрана.
Обвинителите се нафрлија врз Јанева небаре се адвокати и извршители на владата и на Груевски. Ниту еднаш во целата расправа не го спомнале мотивот зошто е формирано Специјалното обвинителство што воедно е најсилен доказ дека редовното обвинителство ништо не работи кога е во прашање организираниот криминал во високите ешалони на власта и владата. Ниту еден предмет во Македонија не е отворен за корупција и криминал на највисоки функционери на власта. Според тој критериум, Македонија има најчесна и најчиста власт со лидери кои на мравка не газат, а не пак да бидат замешани во коруптивни афери и организиран криминал. Ниту едно прашање не поставиле големите обвинители што и’ стои на патот на Јанева како главна пречка што се’ уште нема обвинителен акт за тоа што треба да го сработи и за што е формирано обвинителството со специјален закон. Сите тие големи обвинители знаат дека Специјалното обвинителство е формирано поради нивната неспособност во откривање на кривични дела кои произлегуваат од прислушуваните разговори. Наместо со тоа да исперат нешто од својата срамота, овие наши правници за одбрана на криминалот и криминалците се занимаваат со записници и разни други формални и небитни прашања, зошто и како Јанева го менувала својот тим. Наеднаш обвинителите многу се загрижија како за ланскиот снег што Јанева отпуштила некои обвинители добро знаејќи ги причините за тоа.
Видовме во „Утрински“ дека сите специјални обвинители во регионот се изложени на силни притисоци како од политички, така и од криминални подземни структури, ама нигде не видовме дека колегите-обвинители се впрегнале да ги сотрат специјалните обвинителства само затоа што тие не успеале да се справат со големиот криминал на највисоките државни функционери.
Тактиката на топло-ладно во стилот парламентот и’ го одобрува буџетот на Катица, премиерот јавно ја прогласува за непријател број еден, а обвинителите и’ се закануваат со компромитација на стручноста, Уставниот суд со укинување, провладините медиуми со процедура за разрешување во парламентот е најголемиот доказ колку е корупцијата стасана до врвот на државата и колку е голем стравот од непречена работа на специјалниот обвинител и обвинителство.
Постојаните судски тужби и закани од страна на власта кон лидерот на опозицијата е дел од тактиката да се троши залудно времето на политичките противници и да се застрашуваат луѓето кои се неопределени и се најголемото мнозинство во гласачкото тело. Новите предуслови за контрола на избирачките списоци се доктрина на уплашената власт да се предизвика опозицијата на бојкот на изборите. Во целата ова трагична ситуација не може човек да не се изнасмее на последните барања како да функционираат медиумите, особено јавниот сервис МРТВ. Падна предлогот од страна на власта да има по двајца уредници на МТВ, еден на власта, другиот на опозицијата. Посмешна и поглупава работа немало никогаш во новинарството, а евентуалната примена на таков предлог би било нешто најнавредливо за новинарството во целиот свет. Едни вести на опозицијата, други вести на власта. Таква папазјанија нема ни во хумористични емисии, а не може ни да има кога во Македонија е забранет и хуморот.
Не паметам во Македонија некој странец да бил изложен на толкав притисок и навреди како Ванхауте кој Груевски го нарече јавно со непристојни зборови „разни ванхојтовци“, „катици“ и „сеачи на магли“. Кога го слушнав ова, си ја покрив главата со чаршаф од туѓиот срам. Отворената поддршка на Европа на режимот на Груевски, како компензација за браната кон бегалците, веројатно ќе донесе уште многу срамни ситуации, но искуствата со Европа кажуваат дека воопшто нема да и’ биде тешко да ја сврти другата страница кога ќе и’ затреба. Прерано е да мислите дека Груевски се радува на изборната победа. Тој, всушност, е еден многу исплашен човек.
(Објавено во Утрински)

