Tag Archive | "Охрид"

Tags:

Пријава до Чавков и до Спасовски

Posted on 16 November 2016 by erizaov

prespa

Ме стаписа рамнодушноста во јавноста за неодамнешниот голем подвиг во лов на терористи. Директорот на Бирото за јавна безбедност Митко Чавков лично обелодени дека во извонредно добро подготвена полициско-разузнавачка меѓународна акција се фатени двајца скопјани исламистички терористи, кои имале мобилни телефони, фотографски апарат, компјутер, таблет, СИМ-картички, УСБ, железен „боксирач“ и еден куршум. Многу, многу опасни терористи. Едниот е фатен во Арачиново, другиот во Приштина. И толку, само една вечер на сите ТВ-вести се прикажа ударна сторија дека двајцата подготвувале терористички акции во Македонија, а веќе утредента како ништо да не било.

Си велам, што е работата една ваква значајна акција од меѓународен карактер изведена спектакуларно со специјални полициски единици да се потроши за една вечер. Толку многу ме импресионира овој успех што и јас читајќи весници, открив уште поголемо злосторничко здружение, кое еве јавно му го пријавувам на директорот за јавна безбедност господинот Митко Чавков и на МВР и на министерот Оливер Спасовски за да спречат опасен напад за присвојување дел од територијата на Македонија и нејзино деградирање со цел да стекнат профити и да ја посрамотат државата пред целиот свет. Станува збор за одред од над 20 учесници кои го подготвуваат нападот во нашите најубави региони кои се под заштита на државата и на Обединетите нации како природна реткост меѓу најубавите во светот. Луѓето кои го подготвуваат овој напад за освојување територии се лоцирани во Владата. Не верувате, па не е за верување оти нападот го подготвуваат тие што се должни да го бранат тоа наше најголемо богатство како очите во глава. Ич не е за верување, ама вистина е.

Владата најави озаконета кражба од природата во националниот парк „Галичица“ на 1.198 хектари околу 12 милиони квадратни метри кои ќе бидат наменети за изградба на разни објекти и инфраструктура за развој на масовен туризам. На овие 1.200 хектари кои се дел од 22.750 хектари колку што изнесува површината на националниот парк „Галичица“ доколку навистина се изградат капацитети за масовен туризам, скијачки центри, новиот пат кон Албанија, туристичка зона во Љубаништа, во Отешево, во Стење, тогаш опасноста и за Охридско Езеро и за Преспанско Езеро и за целото крајбрежје на двете езера и за живиот свет, за голем број ретки животински и растителни видови е огромна бидејќи масовниот туризам и големите туристички капацитети и грубата комерцијализација и профитерство кои секогаш кај нас се поврзани со корупција се во спротивност со заштитата на природното и културното богатство кави што се Охрид, Охридско Езеро, „Галичица“, Св. Наум, Љубаништа, Преспанско Езеро, Отешево и Стење. Сите тие се во опасност на што предупредуваат Обединетите нации, односно УНЕСКО под чија заштита се Охрид, езерото, целото крејбрежје и 72 проценти од територијата на „Галичица“ полна со уникатна флора и фауна. Од УНЕСКО последните години постојано доаѓаат сериозни укажувања за повеќекратни скрнавења во Охрид и крајбрежјето на строгите правила кои треба да се применуваат во регионите кои се под заштита на ОН. Веќе се изречени директни предупредувања од експерти за одземање на големата придобивка да се биде под заштита на УНЕСКО како еден од најубавите природни реткости во светот бидејќи се доведени во опасност не само светското природно, туку и културно богатство и нашето духовно наследство.

ohrid

Алармот е вклучен пред повеќе години меѓу научниците, во невладините организации и во медиумите, во УНЕСКО, меѓу голем број луѓе од сите меридијани кои ги виделе непосредно овие убавини. За спас на нашето природно, културно и духовно богатство на интернет тече петиција во која веќе се потпишале илјадници луѓе од целиот свет кои бараат од властите целосна заштита на Охридско Езеро и тоа да остане во списокот на УНЕСКО. Очигледно ова никого посебно не вознемирува во Владата. Во тоа тие не гледаат ни терористички чин, ни криминал, ни корупција ниту пак некакво значење им даваат на флората и фауната и на охридско-преспанските води и извори кои се најскапоценото нешто што го има Македонија. Во Владата одамна се кроеја планови како да се остварат големи профити од Охридско Езеро и Св. Наум. Работата беше речиси готова со индискиот милијардер Субрата Рој кога требаше од Љубаништа и Св. Наум да се прави Лас Вегас, а од Охридското Езеро хидродром на кој ќе слетуваат авиони со туристи од целиот свет. Откако омилениот гостин на Владата и спасител од Индија, големиот инвеститор Субрата Рој заврши во затвор, сега се изменети проектите, а апетитите се многу поголеми. Малку се за големи бизниси само Охрид, Љубаништа и Св. Наум, туку е потребна и „Галичица“ и Отешево и Преспанско Езеро сосе Стење.

Ова злосторство доколку се изврши, е рамно на терористички акт од најопасен вид бидејќи не се во прашање идеолошки екстремисти и радикали, туку се работи за озаконет грабеж на тие што треба најмногу да ги заштитат природните богатства и реткости. Што мислите дали оваа невидена алчност, конечно, ќе ја разбуди свеста кај граѓаните дека не може се’ да се продава, особено не ова парче света земја и свети води кои се иднината и спасот на Македонија да не биде спржена пустина.

(Објавено во Утрински)

Comments (0)

Tags: , ,

Чија земја брани дедо Тимотеј

Posted on 15 July 2014 by erizaov

Ја следам војната на владиката Тимотеј од првиот ден како осамен брани од грабливци едно парче света земја. Имам впечаток како никому да не му е гајле чија земја варди упорно и храбро дедо Тимотеј, црковна, државна, земја под заштита на ОН, или не’ брани сите нас од нашиот кукавичлак што не смееме да кажеме – чекајте бре властодржци, лакомци полакомени, не е се’ ваше во државата. Оваа рајска градина е дар од природата, наследство до Бога за целиот свет. Тргнете ги рацете од Охрид, од Езерото, од крајбрежјето, оставете нешто недопрено и чисто во Македонија.

Ова нема кој да го каже гласно во библиската земја, за жив срам и голем грев. За ова молчи еколошки чистата влада и чесна власт, молчат интелектуалните елити и уживатели на национални пензии и приматели на додатоци и надомест од буџетот за живот во страв. Тивка е и црквата и другите владици во својот протест стокмен ептен христијански. Ќе се појави тук-тек по некој лелек во медиумите, по некој врисок во некои еколошки друштва и толку. Битката е изгубена оти еден црковен великодостојник не може сам да ја извојува, па макар и Господ му помагал. Од овие нема спас.

Знае дедо Тимотеј добро дека за заштита од птици грабливки на нивите се ставаат плашила. За да не влезе стока се става ограда. Од луѓе нема одбрана. Уште ако се од уќуматот, од власта, отиде берикетот сосе земјата. Ако наумила Владата таму да гради задужбина на Субрата Рој или нему слични, тоа така и ќе биде кога нема кој да каже чекајте, ова не е ваше. Ова е наше.

Не сакам во принцип да напаѓам човек кој ги плаќа своите гревови лежејќи затвор. Ама измамници кои на сиромашни и гладни луѓе им ги украле залците од уста им го дрпнале последниот грош, кога таквите белосветски арамии и хохштаплери ќе најдат прибежиште во влијателни и моќни кругови на власта и кога насмевнати се сликаат и ликуваат со државниот врв, е тогаш тоа веќе излегува од рамките на сите овоземни и небесни закони. Тоа е веќе опачината на човештината. Субрата Рој лежи во затвор и чека правда, а неговото семејство лека полека се доселува во Македонија со уредно добиени државјанства и купен имот. Се разбира дека имаат на тоа право според нашите закони и прописи, само треба да ги прашате луѓето кои со години чекаат да бидат македонски граѓани, што тие мислат за оваа државна интервенција да добиеме значајни ВИП-сограѓани кои не ги сакаат во нивната татковина. Домаќините на Субрата Рој одамна молчат за својот уважен гостин, спасител на Македонија. Кога предупредуваме дека со луѓе кои се под судска истрага владите не преговараат зделки, нашите политички лидери и министри одмавнуваа со раката и не’ нарекуваа со погрдни зборови како непријатели на татковината. Сега кога се виде карикатуралноста на целата таа авантура со се’ уште неизвесен крај, планот на Субрата да гради коцкарница и хотели кај Љубаништа и Св. Наум уште е актуелен. Ако не биде Субрата, галиба власта се подготвува да биде некој друг од белиот свет, или некој наш новопечен чорбаџија.

Во светот каде што владее правото и каде што важат законите без оглед кој е на власт, практиката вели дека и покрај постојната законска регулатива мора да се донесе посебен закон за експлоатација, или за давање под концесија на земјиште, реки, езера, шуми, планини или други природни реткости што спаѓаат во делот на национално природно богатство, или во делот на светска културна оставнина. Покрај Охрид и Езерото како наше посебно најголемо национално богатство има уште неколку региони со непроценливи природни убавини кои не смеат да се скрнават, или како било да се нарушуваат без строги законски прописи стручно и научно верификувани само за таквите природни реткости и области. Такви строги закони, но уште построга еколошка свест за своите национални паркови и природни богатства кои припаѓаат на целото човештво и на идните генерации имаат граѓаните на сите земји со демократска традиција и каде што навистина владее правото, но и културата на живеење и заштита на човековата околина која се всадува од пелени.

Ако оваа битка ја изгуби дедо Тимотеј, најмалку тоа ќе биде негов пораз. Обратно, тоа ќе биде пораз на сите нас, на сите кои молчиме кога се крчми природното богатство без оглед кој се води како сопственик и титулар, црквата, државата или кој било друг. Разликата е само во тоа што владиката и уште неколку луѓе ќе можат барем да кажат дека се обиделе нешто да направат, да спречат едно злодело. Но во тоа не успеале, само поради фактот што останале очајно малцинство.

Објавено во Утрински весник

Comments (0)


Photos from our Flickr stream

See all photos

Twitter


календар

November 2017
M T W T F S S
« Oct    
 12345
6789101112
13141516171819
20212223242526
27282930