Banner
Ориент експрес

Мицкоски нагло закочи и тргна во рикверц

u turnЛидерот на опозицијата, Христијан Мицкоски, нагло закочи и почна да вози во рикверц. Досега леташе со 150 километри на час по автопатот „Александар Македонски“, но во спротивна насока. Откако дозна дека е преименуван во „Пријателство“, за малку ќе имаше директен судир со голем шлепер. Се паркира на првиот паркинг и реши да чека да го извлечат и да го преместат на вистинскиот пат. Тоа се новите околности и новите сообраќајни знаци кои мора да се респектираат, појасни Мицкоски. Не може да се вози во спротивна насока по автопат и по еднонасочна улица. Се доведуваат во прашање, покрај својот живот, и животите на многу луѓе.

Христијан Мицкоски доживеал уште еден шок кога влечната служба го означила неговиот паркинг на автопатот Е–75. Како прашал вчудовиден, зар ова не е „Пријателство“, односно „Александар Македонски“. Не, му рекле возачите за помош на патиштата, ова е делница на патот од Лондон преку Ла Манш и преку цела Европа и преку Босфор и  половина Азија до Техеран, така ќе продолжи и до Пекинг. Никогаш не го променил името, постојано и секаде се вика Е-75. Чекај, чекај, па ова е сосема нова ситуација, нови околности кои не сме ги знаеле, рекол Мицкоски, молејќи бргу да го шлепуваат.

Мицкоски ја нема храброста на претседателот на државата Ѓорге Иванов, кој, пак, на враќање од Скопје кон Валандово вози минибус со неколку патници, исто така, на погрешниот дел на автопатот во спротивна насока. Но, во случајот со претседателот на државата нема опасност од жртви бидејќи полицијата навреме го стопирала сообраќајот со аларм за општа опасност, забрана за движење на сите моторни возила и пешаци, па така и возачот и патниците во минибусот уште не ја осознаваат заблудата, бидејќи се сами на патот, па со полна брзина непречено возат накај дома без да има потреба да ги почитуваат сообраќајните знаци. Сите, живи и здрави, ќе стасаат бргу дома, но глобата за  штетите од подолгиот застој  на сообраќајот ќе мора да ја плати возачот на повеќегодишни рати со високи затезни камати.

Почитувани читатели, оваа илустрација со возење во погрешна насока и со нови сообраќајни знаци во нови околности е обид да се објасни колку што е можно поедноставно големиот идиотизам од реченицата која се вергла милион пати како најнова сапуница деновиве – дека немаат врска договорот со Грција и членството во НАТО и во ЕУ.  Мицкоски и Иванов се фатија за оваа сламка како давеници за спасување од глупоста што  ја направија, која ептен излезе на виделина со ашиќере попречување на иднината на државата, која ја одредуваат сојузите со НАТО и ЕУ. И сега двајцата како фанатици проповедаат дека нема никаква врска членството во ЕУ и во НАТО со договорот со Грција. Цели десет години им ги полнеа главите на луѓето и ВМРО-ДПМНЕ и д-р Никола Груевски и д-р Иванов дека само поради Грција и нејзината привилегирана позиција од страна на Европа и на Америка не сме членки на НАТО и не можеме да почнеме преговори со ЕУ, а сега одеднаш велат дека тоа едно со друго нема ништо заедничко. Договорот со Грција е капитулација и домашно предавство, а влезот во ЕУ и во НАТО си е сосема друга и многу значајна стратегиска цел која треба да ја оствари нивната влада по падот на предавниците, а не на референдум.

Па така, претседателот не само што нема до го потпише договорот, без оглед што е двапати ратификуван во Собранието и што прави тежок престап со непочитување на Уставот и закономерноста на парламентарната демократија, туку нема да го потпише дури и ако граѓаните на референдум ги прифатат евроатлантската ориентација и потпишаниот договор со Грција.

Всушност, дали претседателот ќе потпише по изјаснувањето на граѓаните на референдум за НАТО и за ЕУ, или нема да потпише, тоа зависи од тоа дали ќе му се допадне референдумското прашање, уште повеќе дали ќе му се допадне одговорот на граѓаните и дали тие денови ќе биде добро расположен. Ами како. Ако некрунисаниот крал од Водно оцени дека граѓаните како луѓе со посебни потреби се донесени во заблуда од предавниците и непријателите на татковината, тој нема да потпише капитулација. Тоа се новите околности на Иванов и на Мицкоски во подготовките да го прогласат уште неодржан референдумот за фалсификат.

Меѓутоа, големата изгледност над 700.000 граѓани да кажат „да“ за ЕУ, за НАТО и за договорот со Грција е опасност која предизвикува уште понови околности кај Мицкоски и во ВМРО-ДПМНЕ, без оглед дали референдумот ќе биде успешен или не. Веднаш по референдумот може да уследат оставки на премиерот и на владата, распуштање на парламентот и нови предвремени парламентарни избори уште оваа година со предизборна коалиција на сите политички партии кои се за европска Македонија и кои го поддржуваат договорот со Грција и ги прифаќаат компромисите кои со ништо не ги повредуваат националните и други идентитетски обележја на македонскиот народ и на другите народи што живеат во Македонија. Читањето на договорот со Грција во нови околности без висока температура и со студени глави открива дека е прифатлив како предуслов за членство во ЕУ и во НАТО, дури и повеќе од тоа што се надеваа политичарите кои биле сведоци и учесници во долгогодишните разговори и преговори со Грција.

Можноста за нови предвремени избори веднаш по референдумот се новите сообраќајни знаци покрај  автопатот кои го натераа раководството на  ВМРО-ДПМНЕ, претседателот Христијан Мицкоски и потпретседателот Александар Николоски, веднаш како пожарникари да тркнат до своите медиуми и да приопштат дека ќе ги бојкотираат и евентуалните предвремени избори по референдумот ако не ги организира ВМРО-ДПМНЕ, односно ВМРО во МВРО. Бараат министерот за внатрешни работи да биде од ВМРО-ДПМНЕ за време на евентуалните предвремени избори. Најпогодна за тоа е Гордана Јанкулоска, која со своето големо искуство ги знае сите јатаци кои останале во МВР и кои работеле посветено за ВМРО-ДПМНЕ на сите избори.

Некој галиба му шепнал на Мицкоски дека со 700 до 800 илјади гласови за европска Македонија во истиот миг се селат не во подлабока  опозиција, туку на други адреси, а некои дома. Сега Мицкоски ќе почека да види што ќе биде од сето тоа, па потоа  ќе  размисли  дали е можно да се бојкотира и референдум и предвремени парламентарни избори, а притоа  да се докаже дека влезот во НАТО и во ЕУ нема врска со капитулантскиот договор, оти тој ќе склучел уште подобар.

Равенката што ја решава Мицкоски како нова околност гласи: колку места во парламентот ќе освојат противниците од предавничките европски партии, ако 700 до 800 илјади луѓе гласаат за нив на предвремени парламентарни избори што може да се одржат уште годинава ако продолжи да проповеда бојкот на референдумот. Дали тогаш  ВМРО-ДПМНЕ, Мицкоски и Иванов ќе имаат потреба нешто да се прашуваат или да потпишуваат. Или можеби најдобро е веднаш да се приклучат во  заедничкиот проглас на сите проевропски политички партии до граѓаните на Македонија да излезат на референдум и да гласаат по своја волја дали се за европска иднина на државата прифаќајќи го договорот со Грција, или се против. Само така ВМРО-ДПМНЕ останува на политичката сцена со шанси да расчисти со товарот во партијата.

(Објавено во Независен весник)

Коментирај:

коментари:

Овој текст има 4 коментари

  1. Ајван Доктор®

    Едно е сигурно, Ѓорге беше најмолчеливиот претседател на „самостојна“ Македонија и молчеше со години во најкритичните моменти, а кога ќе отвореше уста секогаш излетуваа „бисери“ од типот Свети Павле Паљурски, македонската космодиск демократија, разумниот компромис како разумен компромис далеку од разумот и сл. или пак тоа го правеше како апологија на владеењето на најдрските лопови во историјата на Македонија. Сега се осмели по втор пат да го прекрши највисокиот закон во државава – Уставот на Република Македонија, кој вели дека претседателот е ДОЛЖЕН да го потпише указот „ако Собранието по втор пат го усвои законот со мнозинство од пратениците“ (член 75 од Уставот на РМ). Како ни е познато прв пат го стори тоа со аграцијацијата според одамна укинат член во законот која не смееше да ја стори, особено не смееше да покаже таков впечатлив дилетантизам еден доктор на правни науки кој згора на тоа е и професор на државниот универзитет.

    ВРО-ΔΡΠΑΜΕ имаа цели 11 години да создадат добра преговарачка позиција на Македонија за да направат „идеален“ договор со Грција. Не е дека тие не се обидувале да го сторат тоа. Говорот на Буш пред НАТО самитот 2008. го потврдува тоа „утре НАТО ќе донесе историска одлука за прием на трите балкански нации Хрватска, Албанија и Македонија…“. Дека е склопен договор во тоа време потврдуваат и изјавите на Гwујокио, но и обидот за пропагандна поддршка на неговите гласноговорници М. Неделковски и М. Велиновска да го протнат тоа како „прекар“ (нивните интервјуа за Радио Илинден од Мелбурн). Единствениот проблем беше опстанокот на таа власт на тронот и тоа што македонската „патриотска“ јавност не беше информирана дека нивните вождови воделе тајни преговори. „Народот“ (нивните слепи поддржувачи) на кој се повикуваат не знаеше дека најпатриотскиот дел од патриотите, оние кои според нив „постојано стојат на браникот на татковината“ веќе скришум „ги предале“ и државава и името (што-не-го-даваа) и си договориле таа да се вика Во-Заграда-Скопје, па само затоа (тоа им е веќе јасно и на малите дечиња) свесни дека не можат да побегнат од тоа да ги оквалификуваат како „предавници“ и заради започнатата акција на перење пари преку стиропорниот барок, „храбро“ одбија да го променат името еден час пред настанот. Веројатно меѓу причините има и уште нешто тесно поврзано со алчноста на таа владеачка каста, но ќе дојде денот кога македонската јавност ќе го дознае и тоа.

    Веќе видовме како ги местат изборите, а бев и очевидец кога во 2013. неколку пати гласаа прекубројни гласачи носени за раче од пустелија во Центар. Она што е симптоматично е што ВРО-ΔΡΠΑΜΕ не само што има јатаци во МВРО-ВМРО, туку има изградено цел паралелен систем на власт (јатаци) во сите институции на државава полн со нивни партиски војничиња кои работат по команда, спротивно од функциите на институциите, а чија главна цел е да не им успее било кој потег на овие другиве кои не се ни свесни дека такви лукративни суруши, кои би си ја продале и сопствената мајка за да дојдат до посакуваното, имаат и во сопствените редови.

  2. nacional-patriot

    Pred samitot na NATO vo Bukuresht 2008 godina,togashnoto rakovodstvo i togashnata opozicija prifatija Republika Makedonija(Skopje),so taa razlika shto VMRO-DPMNE toa go prifati uslovno,odnosno toj predlog da odi na referendum,a SDS togash ushte beshe protiv referendum.Ako otideshe toj predlog na referendum,narodot kje go odbieshe,kako i bilo koj drug predlog za promena na imeto.A za volja na vistinata,ne e tochno deka makedonskata vlast se otkazhala od toj predlog pred ili za vreme na samitot.Toj predlog vednash beshe odbien od Atina,ushte pred da zapochne samitot.No iako Atina go odbi,nashite mivki politichari od vlast i opozicija i mivki novinari(chest za iskluchoci)ja podgrevaa atmosferata i stimuliraa nerealni ochekuvanja,no i pred da izleze toj predlog,taka se odnesuvaa.Takvi ochekuvanja se pojavija kaj naivnite.Zakluchokot e deka toj predlog ne pomina,ne beshe staven na referendum,samo zatoa shto beshe odbien od Atina.

  3. Ајван Доктор®

    Да, да. Гвујо им поставувал услови на САД! Херој! =:0)) Туку, и он ни се претставуваше како национал-патриот! Џорџ Буш не знаел што збори ден пред самитот. Будала неинформирана, немал доволно податоци од ЦИА! Глупав тој: https://www.youtube.com/watch?v=XXRS2dxSsB8&t=25s (0:07). А точно е и дека Гwујокио не пwифатил, односно пwво прифатиу, ама го одбил многу порано, сакал прво на рефеwендум да го даде… https://www.youtube.com/watch?v=ivIJzpVfwOg (цела снимка) и: https://www.youtube.com/watch?v=kM9o3Q6w7kA Коза лаже, ама рогот никако. Толку од „национал-патриотите“.

  4. nacional-patriot

    Ti si skaran so faktite i vistinata.Atina nedvosmisleno,vednash go odbi toj predlog.Toa shto glupakot Bush se izleta so taa negova izjava,iako znaeshe deka Atina nema da dozvoli priem,si pokazha vsushnost kakov politichar bil.I navistina budala neinformirana.Ili CIA mu davala pogreshni informacii.Ako Gruevski go odbil predlogot,togash zoshto chesto pati negovite protivnici go zboruvaat i pishuvaat negovoto prifakjanje na toj predlog?Edno e odbivanje,drugo e uslovno prifakjanje.Toj prifati da se stavi na referendum,ama Atina go odbi predlogot.I shto,ti tvrdish deka Atina ne go odbila toj predlog?

Leave a Reply

Your email address will not be published. Required fields are marked *