Archive | September, 2017

Tags: ,

Тарчуловски за претседател

Објавено на 22 September 2017 од erizaov

150610360062947

ВМРО-ДПМНЕ и Никола Груевски ептен му ја симнаа цената на Јохан Тарчуловски кандидирајќи го за градоначалник на скопската општина Кисела Вода.

Евтино ги потрошија високите дострели на овој голем патриот и борец за слобода, ценет и угледен граѓанин на главниот град, позната јавна личност. Јохан Тарчуловски со своите дела и заслуги мораше да биде кандидиран за претседател на државата со што ВМРО-ДПМНЕ и неговиот партиски врв целосно ќе се рехабилитираше од сите клевети и лаги кои му се налепија во изминативе години од разни надворешни и домашни непријатели.

Тарчуловски за престедател на Македонија ќе беше достојна замена на сегашниот претседател Ѓорги Иванов и силна потврда на политиките на најпатриотската и најреволуционерна политичка партија. Овој потег би бил грандиозен демократски исчекор на целата држава, убава слика за Македонија во светот. Таквиот избор ќе прати силна порака до сите луѓе на земјината топка дека воените злосторства можат да бидат исплатлива инвестиција.

Ете така вмровските кадровици му ја уништија политичката кариера на Тарчуловски, наместо на два милиони граѓани да им биде татко на нацијата, сега ќе мора да трча во трката за да управува со шеесеттина илјади скопјани вклучуваји повеќе скопски села чиј атар зафаќаат респектибилна површина од територијата на жална Македонија.

По оваа шокантна вест дека Тарчуловски е кандидат за градоначаник на Кисела Вода нормален човек не може, а да не се праша: добро бе луѓе има ли таму во ВМРО-ДПМНЕ некој кој е свесен каква порака со оваа кандидатура се испраќа и дома и ширум светот.  Човекот одлежа десет години затвор како осуденик на Хаг за воени злосторства. И наместо да се остави на мира, како и што беше удобно згрижен од партијата, ама на државна сметка, сега ВМРО-ДПМНЕ го нуди Тарчуловски на кантар сметајќи дека убиствата извршени во скопска Црна Гора и пресудата во Хаг се одличен влог за победа и спасување на власта од правдата за други злодела извршени во време на 11 години владеење без контрола. Што сака ВМРО-ДПМНЕ да докаже со оваа кандидатура освен дека се смртно уплашени од соочување со правдата. Дали тие луѓе мислат дека изборот на Тарчуловски за градоначалник е негова рехабилитација, или рехабилитација на државата. Дали изборот на Тарчуловски е доказ за невиност на избори, а не во судница и пред непристрасни судии.

Како што Никола Грувески и семејството страхува од пораз на локалните избори што води кон соочување со правадата, така, чинам, деновиве страхуваат, могу луѓе кои не се партиски загрижени, што ќе значи Тарчуловски да победи на избори, па и да изгуби со добиени повеќе десетици илјади гласови на луѓе кои заокружиле воен злосторник за градоначалник. На каква вага ја става ВМРО-ДПМНЕ Македонија со оваа кандидатура. До таму ли сатсаа Груевски и семејството да се одбранат со осуденик од Хаг. Па само ијада луѓе да гласаат за Тарчуловски е трагична порака за угледот на Македонија. Великодостојниците на ВМРО-ДПМНЕ досега повеќепати со разни постапки покажаа дека не ја признаваат пресудата од Хаг, но овојпат тоа го направија најдиректно и најарогантно. Потврдата дека Тарчуловски не е осудуван како основен предуслов да се учествува на избори,  е објаснета со небулозата дека тоа се однесува само на домашните пресуди, а таму пресудата на некој си суд за воени злосторства во Хаг е добра препорака само за политичка и бизнис кариера. Брука невидена.

Од друга страна, една друга хашка пресуда на судот за правда во прилог на Македонија дека Грција не го почитува договорот и ја попречува неправедно Македонија во нејзните аспирации за членство во меѓународни асоцијации и здруженија, пред сè во НАТО и ЕУ, под името ПЈРМ, преставуваше и сè уште преставува историска одлука на највисокиот меѓународен суд за правда. Ете тоа е ВМРО-ДПМНЕ кога нешто му оди во прилог таламбаси до небо, кога ќе го фатат на дело тогаш врескање пак до небо. За едно Хаг важи, за друго Хаг не важи.

Се разбира, Јохан Тарчуловски, по отслужената казна е слободен граѓанин кој може спокојно да живее и работи, но не може да оди на избори дури иако бил осуден само на еден ден затворска казна, а не на десет години, згора за злодело против човековите права и слободи, за убиство на невини луѓе. Ова е втората штетна злоуптреба на Јохан Тарчуловски од страна на ВМРО-ДПМНЕ, првиот пат кога се одвиваше судскиот процес му се вршеше притисок за заштита на брат Љубе, кој беше синоним на најголемиот патриоизам и најголем адут на ВМРО-ДПМНЕ на сите избори: дека брат Љубе лежи во затвор како страдалник за Македонија. Кај него одеа сите вмровски големци на поклонение со фотопарати и со камери во затворот во Швенинген, што само по себе беше голем притисок на Јохан да не испадне предавник. Јохан сведочеше во корист на брат Љубе. И сега повторно е злоупотребен бидејќи ВМРО-ДПМНЕ пак игра на картата на национализмот и меѓуетничката омраза и делби. Таквото посегање по најчусвителните дамари на државата е всушност и најшетната и најлоша порака пред локалните избори. Граѓаните на Македонија сакам да верувам дека го надживеаја тоа време, иако јанѕите не даваат мир поради трагичните и свежи искуства за лесно разгорување на национализмот, особено со секојдневните бесмислени застрашувања од бегалци муслимани и наводната голема опасност од загроза на македонскиот јазик на сметка на албанскиот.

Кога се палат меѓуетничките огнови фактите не значат ништо.

Коментари (2)

Мааџири и домороци

Објавено на 05 September 2017 од erizaov

chess-691437_960_720

Староседелеците не ги сакаат дојдениците па макар биле од иста нација, иста вера и имале исти јазик, не се омилени дури и да се од иста крв, блиски роднини и ако се од соседното маало. Мааџирите им го реметат спокојството на домороците, тие се омрзнати натрапници, сељачишта, кои им го земаат просторот на тукашните, носат нови обичаи и навики неприфатливи за автентичните, во повеќе генерации, жители на еден кварт, град или било кое населено место. Меѓутоа, кога ќе се каже дека наближува инвазија на бегалци од други држави, различни од нас, со друга вера, со друг јазик, со друга боја на кожата, сиромашни луѓе кои бегаат од војна и од глад, тогаш, настапува прво шок, силен стрес, па вистинска паника, поопасна од таа да се инсталира депонија среде плоштадите во градовите и во населбите. Боже спаси нè, доаѓаат варвари, вандали, терористи и убијци.

Во Македонија со денови бијат вмровските камбани за тревога од една таква  голема опасност од населување на преку 200.000, а можеби и 300.000 муслимани и бегалци од Сирија, Ирак, Авганистан… кои ќе ја окупираат земјата. Најмалку половината од нив се терористи и муџахедини. За нив новата предавничка власт подготвува станови во сите градови кај што може опозицијата да победи на локални избори. На сите бегалци ќе им се дава социјална помош во пари и ќе им се додели бесплатно земјоделско земјиште, ќе имаат предност при вработување, ќе им се изградат училишта за нивните деца, мали монструми, ќе никнат нови џамии и  минариња. Сите тие кољачи уредно ќе добијат лични карти и ќе можат да гласаат на изборите, исто како да се дојдени од Пустец.

Така Америка, ЕУ и предавничката власт во Македонија ќе победат на изборите во сите  градови и села, потоа веднаш ќе го сменат уставното име на државата, ќе го воведат албанскиот како службен јазик и ќе мора сите  да учиме албански оти дебело ке нè казнуваат. Потоа  Бугарите ќе ја добијат бакшиш Источна Македонија, Албанците западна сосе половина Скопје, а Србите ќе се задоволат со другата половина од десната страна на Душановиот мост со северниот дел на Македонија. Грција останува да ја контролира вардарскарта долина. Тоа и било најважно откако ќе ја снема Македонија.

Луѓето што ја смислиле ова доктрина и што се кријат зад граѓански асоцијации не се ни болни, ни ненормални. Тоа се интелегентни криминалци и гангстери кои со сеење страв меѓу граѓаните сакаат да победат на избори и да го одложат соочувањето со правадата и со судот поради направените злодела и поради грубо кршење на законите во повеќегодишен период. Во стравот големи се очите. За да се спасат себеси смислиле како да ја спасат државата од непостоечка опасност па ги викнале на помош фантомските бегалци. Ги вклучија сирените за тревога и најавија реферндуми за заштита на државата од бегалци баш на денот на локалните избори.

На 15 октомви луѓето рано сабајле ќе одат прво во црква, потоа ќе одат да заокружат „НЕ“  за бегалци, против  населувањето на исламски терористи и на крајот ќе одат да гласаат против новата власт која ја раскрчмува Македонија. Ова не можат да го смислат ни најголемите лудаци. Тоа е дело на очајници. Но, ако тие не се луди, тогаш кој е луд во Македонија што некој, било кој, може да сее страв и паника неказнето, да организира собирање потписи и референдуми за непостоечка бегалска инвазија, да повикува на омраза, да лаже безочно за изградба на станови, делење  социјална помош, на раздавање земјоделско земјиште, вработувања, и разни други привилегии. Дали во оваа земја има јавни обвинители, полиција, судови, институции на системот кои се должни, законски обврзани и одговорни да спречат вакви јавни и масовни обиди за дестабилизација на државата за да се спасат грст криминалци од соочување со правдата за свои поранешни кривични дела. Сите тие што се одговорни и надлежни да покренат соодветни постаки во вакви случаи загадочно молчат небаре гледаат некој хорор филм несвесни дека тоа се случува во нивниот двор кој им е даден на одржување и за тоа примаат плата и уживаат одредени привилегии. Мислам дека лудилото е кај нив кога сето тоа можат да го гледаат, слушаат спокојно без да си ја работат својата работа.

Добро што новата власт не ги практикува методите на старата власт. Инаку сега ќе имаше закажано паралелни референдуми на 15 октомври во истите градови на кој  ќе се бара граѓаните да се изјаснат дали се за слобода на криминалците, или треба да им се суди. Добро е што новите не сакаат да бидат исти како старите. Нека нема референдуми за владеење на правото, или на кривото. Ама јас ќе гласам на локалните избори така што гласачкото ливче ќе го прочитам како референдумско: Дали си за тоа осомничените за криминал да одат на суд и да ја докажат таму својата невиност,  или да се вратат на власт и таму да ја докажат својата чесност.

Нема коментари


Photos from our Flickr stream

See all photos

Twitter


календар

September 2017
M T W T F S S
« Aug    
 123
45678910
11121314151617
18192021222324
252627282930