Archive | October, 2016

Tags: ,

Молба до Груевски

Објавено на 31 October 2016 од erizaov

pesevski-spasov

Викендов почувствував голема потреба јавно да го замолам претседателот на ВМРО- ДПМНЕ Никола Груевски да не презема никакви казнени мерки против своите носечки партиски кадри Владимир Пешевски и Диме Спасов поради некакви банални скандали во кои се најдоа ни криви, ни должни овие две големи перјаници на партијата. Не знам зошто се крена толку прав што Пешевски најучтиво ја прашал една новинарка: дали нејзините знаат дека е проститутка, или што Спасов млад и темпераментен час министер, час заменик, направил само две сообраќајки без жртви возејќи полноќен слалом со службен џип ептен расположен и весел низ центарот на Скопје. За вакви мали наивни детски игри не се жртвуваат големи играчи еден месец пред избори. Нека види цел народ колку е моќна и омилена ВМРО-ДПМНЕ и дека партискиот врв може да прави што сака.

Знам дека Груевски е страшно лут што бадијала набедените момци му ја девалвираа последната голема маркетиншка инвестиција и тоа баш кога стасаа вестите дека Македонија се вивна во светската и во европската економска елита. Во моментите кога сите бевме во транс од среќа што сме меѓу европските прваци по успешноста на економските реформи со рајска бизнис-клима овие двајца реформатори сосема неправедно се најдоа на ударните вести и ги погребаа светските успеси и достигнувања. Не верувам дека Пешевски можел да каже на кој било, а не на новинарка такви погрдни зборови затоа што нешто прашала што не му се допаѓа. Па и да ја прашал дали нејзините знаат дека е проститутка, на човекот тоа му излетало не сакајќи. Боже мој се случува, па познавајќи го, за неколку дена ќе му текне дека згрешил и длабоко ќе се извини. Гарант. Пешевски најдобро во Владата и во партијата знае колку скапо се платени и тешко обработени сите овие признанија и достигнувања со угледните и влијателни институции како што се „Дуинг бизнис“ и магазинот „Форбс“ и некојаси елитна лондонска агенција.

А, оној Диме Спасов, кутро дете, задолжено во партијата за социјална политика да се грижи за сиромаштијата токму кога цела Европска Унија падна на газ од изненадување за економското чудо од Балканот, се најде на ударните вести правејќи невидена балканштина, да не речам свињарија. Во моментот кога со уживање ја читав пораката од Лондон до македонските гласачи дека Груевски е современ прозападен лидер кој ќе победи на изборите бидејќи постигнал извонредни резултати во време на тешка политичка криза во државата која ја наметнала опозицијата, детулево со своите автомобилски карамболи и трки низ скопските улици ми го расипа расположението. Наеднаш му ја презеде главната улога на Груевски и влезе во филм дека го бркале шиптари криминалци, опасни дилери на дрога да го фатат. Не разбрав зошто го бркале баш него, ама не е ни важно кога се Албанци криминалци. Добро е што партиските курири направија брзо и квалитетно новинарско истражување и ја разјаснија работата за обидот за атентат врз младиот час министер, час заменик. Ем го гонеле криминалци, ем не бил тој во колата, туку неговиот возач, а и немало други патници во колата. Во тоа време на полноќ Спасов си спиел дома како и сите добри деца.

Ете затоа јавно го молам Никола Груевски да не се однесува прозападно по најновата титула што му ја дадоа во Лондон, да си остане тоа што е и да ги прифати информациите на куририте како веродостојни и да ги поштеди двајцата докажани играчи во неговиот тим. Не смее да ја направи истата грешка како неговиот колега Александар Вучиќ, кој веднаш го смени својот министер за одбрана Братислав Гашиќ затоа што и’ кажал на некоја безобразна новинарка дека најмногу ги сака жените во клекната состојба. Гашиќ сто пати се извини, ама тоа ништо не му помогна, мораше да си замине.

Груевски треба да го охрабри и Спасов да не повлече погрешен потез како неодамна најмладата прозападна министерка на Шведска Аида Хаџиалиќ, која испила чаша вино и полицијата во рутинска проверка открила дека вози автомобил со 0,2 отсто алкохол во себе. Во многу европски земји, па и кај нас е дозволено до 0,5, но во Шведска не смее од 0,0 да има ништо повеќе алкохол кога сте зад воланот, па дури јаделе и грозје. Па кутрата најмлада министерка во историјата на Шведска, која стасала таму како бегалец од Босна и направила извонредна кариера да стаса до министер за образование на Шведска, експресно свика конференција за печат и си поднесе оставка извинувајќи се дека многу погрешила и дека тоа не смее да му се случи на министер за образование.

Тоа важи за Шведска. Кај нас ќе биде добро да се остави работата да се разводени како и многу пати досега. Секое чудо за три часа. А и онака на изборите Груевски и ВМРО-ДПМНЕ, како што ни кажаа и во Лондон и дома, ќе победат, па сите овие афери и скандали што ја тресат Македонија како „бомбите“ на Зоран Заев, „шок-бомбите“ на Слободан Богоевски и оние нарачани истраги од Америка и од ЕУ од Специјалното обвинителство за големите криминали и корупција… сето тоа ќе го покрие судот на народот на 11 декември кој ќе ги прости сите гревови на власта. Ете затоа го молам Груевски да не ги чепка ни Пешевски, ни Спасов оти ќе се види дека имаат уплав од изборите, а може и овој народ по 11 години да рече доста беше. Потоа што правиме.

(Објавено во Утрински)

Нема коментари

Tags:

Шок-бомбите на разузнавачот

Објавено на 28 October 2016 од erizaov

slobodan-bogoeski

Опасно тивок. Зборува со шепот, а зборовите му одекнуваат како шок-бомби. Не можеш да го гледаш и слушаш седејќи, те тера да станеш простум. Студен како шприцер, мрачен како ноќ, или што би рекле младите, „полицаецот“ е ептен кул. Влезе нечујно во студиото на ТВ Телма како во операциона сала, направи повеќе длабоки резови со скалпел по живо ткиво, без око да му трепне одговори на прашањата на колегата Александар Чомовски, ја крена во воздух јавноста и мирно како што дојде замина или во легендите или го изеде темницата. Бргу ќе дознаеме. Така го доживеав интервјуто на стариот разузнавач, некогашниот шеф на тајната полиција Слободан Богоевски, кој во животот поминал низ сито и низ решето и низ рајски и низ затворски капии.

Се’ што кажа, секоја дума остава без здив. Многу луѓе синоќа останаа без сон, особено ако првото гледање на интервјуто, им беше репризата по полноќ. Чинам не бдееја само засегнатите од она што го кажа Богоевски, туку и секој граѓанин на Македонија кој го проследил разговорот не можел да остане рамнодушен и спокоен иако важиме за нација со прилично бавно горечки фитил. Шашардисан од она што го слушав се фатив како зборувам сам со себе и повторувам неколку пати дали ова е можно, дали ова е можно… лидерот на ВМРО-ДПМНЕ и премиер на Македонија да е лансиран со договор на маса со грчки и домашни криминалци преку конференциска врска. Дали Кондоминас и Малелис ја кроеле македонската Влада и власт. Дали е можно шефот на тајната служба, или како што се вика Управата за безбедност и контраразузнавање, да бил притворуван за продажба на дрога, боже дали е тоа можно… Богоевски кажа уште многу страшни нешта за генезата на ВМРО, за патологијата на врвот на власта посочувајќи ги главните виновници со име и презиме, изнесе јавни обвинувања за големата корупција и организиран криминал, работи кои помалку или повеќе веќе се слушнати во прислушуваните разговори и притоа ги потврди сомнежите како точни дека целата операција на најголемото и најдолго нарушување на човековите права и слободи во Европа по Втората светска војна се направени незаконски по нарачка на фамилијата која владее со Македонија 11 години без контрола и апсолутистички без уставната поделба на власта. Богоевски беше категоричен дека прислушувањето е нарачано и изведено од страна на врвот на Владата и УБК и дека никој друг ниту може да влезе, ниту да организира ваква незаконска хајка и следење на комуникациите на граѓаните. Богоевски на крај се впушти и во предвидувања дека носителите и сторителите на илјадници кривични дела и криминализација на полицијата, ако имаат среќа да го одбегнат судот на ВМРО, животот ќе го поминат во полициски комбиња одејќи на судења од Идризово до судот и назад.

Што може човек по ова да каже. Прво што помислив е дали Богоевски згази на гнила штица да ги зборува овие работи без обезбедени докази. Таа помисла веднаш ја отфрлив бидејќи стариот разузнавач не би си дозволил ни случајно да биде расчеречен поради наивност, или да се истрча поради лична огорченост. Напротив, остави впечаток дека внимава на секој збор и дека за се’ што кажува има докази. Друго е прашањето колку тие ќе важат во македонските судови во кои огромното мнозинство граѓани не случајно најмногу немаат доверба и кои осудија многу луѓе по нарачка, ако се автентични и точни прислушуваните разговори. Слободан Богоевски како поранешен шеф на УБК и разузнавач, како што велат за него висок професионалец тоа добро го знае, па веројатно ги има сите адути засолнати. Не верувам дека тој евтино ќе си ја продаде кожата во јавни настапи без цврсти докази и аргументи кои не може да ги прерипне ни партиското судство. Тужбите веќе од рано изутринава се најавени прашања е само дали ќе бидат експресно процесуирани пред изборите или по изборите. Во новинарските кулоари сабајлево кружеа две приказни дека Богоевски посакува да биде тужен и да се појави на суд со својата архива и дека зад него стојат моќни разузнавачки служби и втората дека е гола вода и брзо ќе заврши во Идризово како Љубе Бошковски бидејќи нема ниту еден доказ за тоа што го зборуваше на Телма што предизвика шок во целата јавност и дека станува збор за злоупотреба на телевизијата.

Се запалија oд реакции социјалните мрежи и онлајн интернет-изданија каде што главна тема е интервјуто на Слободан Богоевски и неговите сведоштва. Колку и да се трудеа провладините медиуми да ја наметнат темата за големите успеси на светските ранг-листи за извонредната бизнис-клима во Македонија преовладеа криминалната клима. Се разбира, веднаш уследија и други текстови и изјави кои треба да означат демант, или потврда на она што го кажа Слободан Богоевски. Што мислите каква ќе биде разврската на шок-бомбите што ги фрли Слободан Богоевски. Дали редовното јавно обвинителство за ваквите тешки обвинувања ќе поведе истрага, или таа главно ќе се насочи кон гонење на Богоевски не е тешко да се погоди. Правдата и утврдување на вистината кога се во прашање обвинувањата за гревовите на врвот на власта е ѓаволски тешка работа сегде во светот. Во Македонија тоа е најлесната работа. Ние имаме безгрешен и најчесен државен врв. Според сите истраги и судски постапки, никој од највисоките македонски функционери последните десет години немаат направено ниту еден прекршок, а да не зборуваме за тешки кривични дела како што се злосторнички здруженија за изборни нерегуларности, нарушување на човековите права и слободи, организиран криминал и корупција. Во цела деценија на апсолутна власт овие луѓе не се огрешиле ни со погрешно паркирање.

(Објавено во Утрински)

Коментари (1)

Tags:

Кукавичко писмо до Јанева

Објавено на 27 October 2016 од erizaov

zvrlevski

Кога се пишува отворено писмо има три клучни елементи. Прво кој го пишува писмото. Второ, до кого е упатено. И трето, мотивите за јавно обраќање и реакцијата на јавноста која всушност е вистинската адреса. Сите овие три работи го одредуваат значењето на комуникацијата на ваков начин. Ако недостига еден од овие предуслови, писмото нема никаква важност. Без потпис кој ја одредува тежината на авторот на јавното обраќање писмото е анонимно, манипулативно и најчесто кукавичко.

Вториот битен елемент е до кого е упатено. Отворените писма ја губат смислата ако не се работи за јавно обраќање до познати и влијателни личности во различни области од јавниот живот кои со своите дела и постапки, а многу често и со своето молчење предизвикуваат големо бранување, незадоволство, револт, разочарување… или пак спротивно, воодушевување, благодарност, респект, признание и поддршка… И третиот момент кој најчесто е главниот мотив е да се добие поддршка од јавноста за општо добро, или да се поттикне реакција на граѓаните со објавување на писмото за да се изврши позитивен притисок до луѓето на одговорни функции да се спречи војна и крвопролевање, да се исправи голема неправда, да се оневозможи загроза на слободата и демократијата, правдата да важи подеднакво за сите граѓани, за независност на судовите и медиумите, за жигосување на национализмот и шовинизмот, за поддршка на борбата против криминалот и корупцијата, исправање неправди и заштита на човековата околина…

Едно отворено писмо, би рекол кукавичко, стаса некни до јавноста со колективен анонимен потпис: јавни обвинители од скопското обвинителство упатени до нивната колешка Катица Јанева, која повеќе од година дена е во центарот на вниманието на јавноста како Специјален јавен обвинител. Нема ниту едно име и презиме на почитуваните јавни обвинители што упатува на тоа дека или тие не го пишувале и не дале согласност за негово објавување, или им било угодно да се скријат зад колективниот потпис на една значајна институција, па испаѓа дека писмото го праќа обвинителството до Катица Јанева. Бидејќи никој не се огласи од јавните обвинители да се изземе од отвореното писмо, тогаш заклучокот е двозначен: или скопските обвинители даваат целосна согласност на содржината на писмото, или имаат уплав, па затоа не се потпишале. Но како и да е, мислам дека тие што го составиле писмото ја згрешиле адресата и наместо да го упатат на јаваниот обвинител Марко Зврлевски, и до претседателот на Советот на обвинители Патар Аневски, го испратиле на Специјалниот јавен обвинител Катица Јанева. Писмото е веќе познато на јавноста што беше и главната цел да се дискредитира и оцрни Катица Јанева и да се даде поддршка на евидентното и јавно попречување на правдата за најзначајните истраги кои се спроведуваат во Македонија од прогласувањето на нејзината независност според Законот за Специјално јавно обвинителство за гонење кривични дела поврзани и кои произлегуваат од незаконски прислушувани разговори. Најдрастичен случај на нарушување на човековите права и слободи направено со повеќегодишно незаконско следење на телефонските разговори на илјадници граѓани и јавни личности. Скопските обвинители колективно и’ забележуваат на Јанева за срамната непрофесионалност со која се прави штета на обвинителската професија и се намалува угледот на обвинителството. Следува правната поука што Јанева не направила професионално, а требало да направи и што изјавила, а не требала да каже пред јавноста. Ах да ќе го заборавев најважното кажано на крајот од писмото: обвинителите ја потсетуваат Јанева дека нивна и нејзина обврска е да се гони криминалот и оти во нивни раце се човечки судбини.

Аууу… ова ми прозвучи многу потресително. Прво што помислив на човековите судбини на луѓето во притвор во „Шутка“ за кој обвинителите досега не покажаа некаква загриженост како во писмото и во последно време. Што се однесува до обвинувањата за непрофесионалноста на Катица Јанева нејзина процена е дали и што ќе одговори. Овој дел што е на адреса на јавноста просто вреска за неколку прашања до колективниот ум на јаваните скопски обвинители. Почитувани загрижени професионалци, дали вие навистина не знаете зошто е формирано Специјалното јавно обвинителство. Дали за тоа вие немате заслуга со вашата високо професионална работа. Дали навистина не забележувате флагрантно попречување на правдата во која учествува и вашата институција предводена од Марко Зрлевски и Петар Аневски, двајца најодговорни луѓе во јавното обвинителство.

Одлично ги познавате процедурите и протоколите кога јавен обвинител постапува по судски наредби, па станувало збор и во истраги на највисоки државни раководители, па макар тоа било и тајната полиција каде што има основани сомневања за незаконско прислушување. Дали вие ја завршивте вашата законска и професионална обврска како што велите во отвореното писмо да го гоните криминалот, што подразбира и криминалците и злосторничките здруженија, особено кога станува збор за истраги на организиран криминала и осомничени највисоки функционери и моќни политичари од врвот на власта. Која ваша истрага доби судски епилог во изминатите година и пол и кој предмет против недопирливите во оваа држава е завршен. Дали со опструкциите на јавното обвинителство, со оцените и изјавите на Зврлевски и Аневски и со вашите отворени анонимни писма не учествувате и вие лично во попречување на правдата и на владеење на правото. Дали се’ уште не го препознавате значењето на овој случај во историјата на Македонија и на правосудството кој може високо да го врати изгубениот углед и доверба и на обвинителствотои на целото судство. Ако тоа не го гледате – јаз’к.

(Објавено во Утрински)

Нема коментари

Tags:

Време е за крај …

Објавено на 26 October 2016 од erizaov

Фото: Твитер

Фото: Твитер

Големо љубопитство предизвикуваат билбордите со нова рекламна порака „Време е за крај на кризата“ со различни потписи, но најчесто стои името Никола. На прв поглед очигледна е политичката порака пред изборите бидејќи Никола Груевски и ВМРО- ДПМНЕ главна тежина на својата изборна стратегија ставија на тоа дека по нивната победа на изборите кога ќе ја преземат власта во свои раце со амин на народот автоматски ќе настапи крај на кризата. Можно е ова да биде и кампања на опозицијата навестувајќи крај на кризата како што некој допишал збогум пред потписот на Никола, па излегува дека крајот на кризата ќе биде со „збогум Никола“. Покрај политичките мотиви за да се избегне казната за прерано почнување на предизборната кампања, не е исклучено дека се работи за вешт деловен човек кој во ова политичко време на лудило кога најмногу се лаже, смислил начин како да го привлече вниманието на својот производ или бренд.

Како и да е, бргу ќе дознаеме бидејќи авторот ќе ги покаже своите мотиви на која криза и’ го гледа крајот. Но останува фактот дека досега не можеше да се стави крај на политичката, моралната и криминалната криза бидејќи Никола Груевски и ВМРО- ДПМНЕ не беа на власт, туку некој друг владееше со земјата, главно разни предавници и непријатели кои ја произведоа кризата во соработка со Америка, НАТО, Брисел, Џорџ Сорос, СЈО… сите ставени под директна контрола на опозицијата и на Зоран Заев, селанчето од Струмица. Тоа што вие мислите почитувани читатели е чист привид, односно само така ви се чини дека веќе 11. година како апсолутната власт е во рацете на Никола Груевски и тесниот врв на ВМРО-ДПМНЕ и дека сега се бара уште четири години мандат со 63 пратеници за натаму без контрола Груевски со соработниците да ги довршат големите дела и проекти кои не’ доведоа до тука кај што стасавме. Нешто не ви е јасно, не грижете се, не е кај вас проблемот бидејќи ова што се случува во Македонија тешко е разбирливо и при здрава памет.

Значи, за да ја разберете работата кога Груевски е на власт, а кога во опозиција мора да размислувате што би се рекло народски со два ума. Секогаш Груевски е на власт и на чело на државата кога станува збор за големи успеси и достигнувања, за брз развој и економски раст, баснословни странски инвестиции, поволна бизнис-клима, грандиозни градителски потфати, нови работни места, висок стандард, поголеми плати и пензии, субвенции за земјоделците, за новинарите, за писателите, за научниците, за академците и за судиите, за обвинителите и за уметниците, за актерите како партиска партиципација и донација од буџетот за нивната независност и самостојност во величање на власта, или како нешто похрабра форма за молчење и правење на удрен дека ништо особено не се случува и ништо не смрди и не се распаѓа во државата. Ова се постигнува со голема и макотрпна децениска работа. Ич не е лесно да се потрошат над 20 милијарди евра народни пари колку што Груевски потроши во изминатите десет години како единствен благајник и клучар на државната каса. Кога беше најтешко и се закануваше беспарица Груевски со својот финансиски тим успеваше со голема пожртвуваност, патриотизам и храброст да не’ заборчи сите до еден до над гушата.

Секогаш пак кога работите не чинат, вклучете го вториот ум, тогаш Груевски и ВМРО- ДПМНЕ се во длабока опозиција. Тие се силни опозиционери ако има криза, каква било, политичка, морална, духовна, прислушување на јавни личности и граѓани, кога има нарушување на основните човекови права и слободи, атак врз демократијата и врз медиумите и новинарите, кога има професионални истраги за криминал и корупција во врвот на власта, кога се откриваат големи изборни нерегуларности, кога има меѓуетнички конфликти, а особено кога се формира Специјално обвинителство кое не е под нивна контрола, тогаш, тие се дење во опозиција, а ноќе на власт. Наеднаш откриваат голема опасност за стабилноста на земјата која инаку е многу цврста, измислуваат нови и стари непријатели главно собрани во заеднички фронт против Груевски и неговите најблиски соработници поради големите успеси на кои му завидуваат и Америка, и земјите од ЕУ и љубоморните комшии и домашните предавници и странски платеници. Најголемата опасност Груевски и неговите соработници и медиуми веднаш ја препознаа во Специјалното јавно обвинителство и специјалниот јавен обвинител Катица Јанева. Пред очите на целата јавност од првиот ден на формирање грубо и со закани ја попречуваат работата на Специјалното обвинителство чие формирање популистички и лицемерно го подржаа со паролата „држте го крадецот“. Нервозата стана се’ поголема кога почнаа првите обвинителни акти јавно соопштени кои водат стручно и професионално кон судска разврска. Злоупотребите на овластувањата на највисокиот врв на власта станаа ептен видливи. Затоа покрај политичката и новинарската партиска елита која не е доволна да се загрози довербата во Специјалното обвинителство власта ги ангажира сите институции на системот: полицијата, судовите, редовните јавни обвинителства, Уставниот суд, Судскиот совет, разни партиски правни експерти со цел да се деградираат и оневозможат специјалните обвинители и Катица Јанева. Она што ги испаничи Груевски и соработниците е влезот на Обвинителството во УБК и се’ поголемата негова популарност. Уште пред шест месеци во истражувањето на ИРИ, Американскиот институт, со кое ВМРО-ДПМНЕ на големо се фалеше поради високиот рејтинг, но го премолче податокот дека 63 отсто од анкетираните ја подржуваат работата на Специјалното обвинителство и имаат доверба во него, наспроти 23 отсто кои немаат доверба. Сега тој процент е далеку поголем на поддршка на Катица Јанева и обвинителството. Нејзиното спречување да ги гони криминалците станува клучен мотив за претстојните избори. Дали таму се гледа крајот на кризата.

(Објавено во Утрински)

Нема коментари

Tags:

Отвори, отвори, отвори …

Објавено на 25 October 2016 од erizaov

otvori-katica-janeva

Не ми излегува од глава глетката што се случи во пресрет на празникот на ВМРО кога јавната обвинителката Катица Јанева викаше на сиот глас пред затворените врати на МВР: „Отвори, отвори, отвори….“, мене тоа ми изгледаше како привидение, ме полазија морници, оти тоа не беше филмска сцена пред порти на жандармерија во темниот вилает, туку Македонија во живо.

Додека со адмирација и симната капа ја гледав оваа храбра жена, која со својот тим е последната надеж дека и недопирливите ќе се соочат со законот и со правдата, првата помисла ми беше ова е врв на ароганцијата, примитивизмот и провинционализмот. Видовме уште една јавна демонстрација во низата на невидена некултура и простотилак. А, што друго може човек да помисли кога на обвинител со судска наредба во рацете му е тресната вратата пред нос од партиски функционери кои за десет години неконтролирано владеење ја претворија МВР во ВМРО-ДПМНЕ. Можете ли да се потсетите кога низ историјата се формираат партиски полиции.

Конечно, портите се отворија и Катица Јанева влезе внатре. Не знам кој ја издаде таа наредба, но сигурно дека телевизиските камери, стравот дека се спречува судска наредба и истрага за големи злодела, а можеби заѕвонил и некој црвен телефон, некого освестиле дека за ова се оди во затвор. Допрва, една по една, сите порти ќе се отвораат зад кои се крие вистината за најголемото нарушување на човековите права по прогласување на независноста на Македонија со повеќегодишно незаконско прислушување и ставање под надзор и контрола на комуникациите на илјадници граѓани и јавни личности.

Станува се’ поочигледно дека и нарачателите на прислушувањето биле прислушувани и дека уште слушаат незаконски. Тоа ако помине неразјаснето и забошотено со победа на изборите, како што проповеда и се надева поранешниот премиер Никола Груевски и како што упати апел актуелниот премиер Емил Димитриев во неговиот празничен говор, дека не се важни обвинителставата и истрагите и судовите, туку само гласот и пресудата на народот, тогаш тоа ќе биде и официјално обзнанено со исклучување на апаратите за вештачко одржување во живот на парламентарниот повеќепартиски општествено-политички систем и целосно уривање на конституционалните темели на државата во која цела деценија нема поделба на власта според Уставот , туку апсолутно владеење на неколку луѓе кои се над законите и над Уставот. Тие злодела не застаруваат, како што не застаруваат ни делата на злосторничките здруженија за изборни нерегуларности и повеќе видови на организиран криминал. Знаете, организиран криминал е кога тие што треба да ве бранат од криминалците се главни носители на корупцијата и злоупотребата на своите функции и овластувања за незаконско стекнување имот и оштетување на државата.


Затворените врати за судот и обвинителството многу кажуваат не само кој бега од истрагата и правдата и кој е уплашен да не излезе на виделина не само она во што многумина кои мислат со своја глава одамна се сомневаат и за што веќе има докази, туку нешто и многу покрупно и пострашно. Операцијата во мозокот на тајната полиција ги изненади најмногу тие што мислеа дека се’ е избришано и дека таму не може да влезе никој што не е партиски подобен и од највисоките ешалони на власта. Суската наредба предизвика шок кај властодржците, па немаа друго чаре освен безочно и јавно да манипулираат со јавноста и да ги затворат портите за правдата, попречувајќи ја да влезе на местото на злосторството. Тие уште не знаат дека кога ќе се затворат вратите правдата влегува низ прозорец. Ако се затворат и пенџерињата правдата ќе стаса преку оџакот… има многу патишта да стаса вистината до вистинскиот суд и судија.

Ајде, повикајте се малку на здрав разум, па размислете што значи кога довчерашниот министер за внатрешни работи Митко Чавков и сегашен директор на Бирото за јавна безбедност излегуваат пред камерите со тврдење дека тоа што го бара судот и обвинителот Катица Јанева не може да се обезбеди бидејќи системот за следење на комуникациите не е во сопственост УБК и дека треба да дојде претставник на компанијата „Ериксон“, која е производител на системот и да ги издвои податоците. Тој систем не е сопственост на МВР, на УБК, сопственост е на операторот и само овластено лице од него може да пристапи до тој систем, рече јавно Митко Чавков. Многу кусо траеше тврдењето на директорот Чавков. Од „Ериксон“ стаса соопштение кое всушност е демант. Познатата компанија тврди дека на 19 октомври добиле барање од специјалното обвинителство, по судска наредба од Основниот суд 1 Скопје, за техничка асистенција заради истрага на функционалноста на законското пресретнување на комуникациите. Од „Ериксон“ велат дека законското пресретнување на комуникациите е задолжителна и стандардна работа во мрежите на јавната телефонија и телеком-операторите. Земјите во светот се обврзани да овозможат таква функционалност за локалните власти. Децидно стои дејка „Ериксон“ не е сопственик ниту, пак, оперира со опремата за законско пресретнување на комуникациите. Внимавајте, цело време станува збор за законско следење на комуникациите, односно законско прислушување. Специјалното обвинителство трага по незаконско прислушување. Дали тоа значи дека „Ериксон“ ќе прати човек да види што било законско, а што незаконски се слушало ако тоа се уште е можно. Веројатно истрагата сега ќе се насочи и кон тоа кој е вистинскиот сопственик и кој е оператор на прислушуваните разговори, а кој се вистинските наредбодавачи. Се стега обрачот иако опструкциите и попречувањата на истрагата се веќе јавни и не се кријат. Таму се и незаконските прислушувачи и наредбодавачи.

(Објавено во Утрински)

Нема коментари

Tags:

Нова надеж за спас на државата

Објавено на 21 October 2016 од erizaov

sjo-ubk

Ете имало и судија со срце јуначко, нa кој му се свети и најважни правото и правдата, кој не потклекнува на притисоци. Судијата Весна Димишкова ги потпиша судските наредби Специјалното обвинителство да си ја врши својата работа според Законот во Управата за безбедност и контраразузнавање, што се вели, да направи систематски преглед на опасно заболениот организам на државната безбедност оти има сериозни симптоми дека е нападнат мозокот кој ја произведе политичката криза во земјата претворајќи го безбедносниот систем во монструм против своите граѓани. Има основани сомневања дека ова злодело го направиле тие што најмногу треба да се грижат за безбедноста на земјата и на граѓаните.

Судијата Димишкова не гази на гнила штица. Ова не е прв нејзин одважен чекор цврсто потпирајќи се на законите и своите овластувања. Има во македонските судови уште судии на кој им се поважни законот и државата од политиката и партиите иако повеќето од нив како неподобни се разместени и маргинализирани. Димишкова и нејзините колеги кои се на страна на владеење на правото заедно со Специјалното обвинителство се новата надеж за спас на Македонија од еднодецениската наезда на режимот на Никола Груевски и неговите најблиски соработници злоупотребувајќи ги на ангро своите функции и овластувања.

Судските наредби за непречена истрага во Управата на безбедност и контраразузнавање предизвика вистинска паника не само во полициските редови, туку и во целиот државен врв. Мобилките се вжештија. Пристигнувањето на специјалниот јавен обвинител Катица Јанева и нејзините соработници во УБК со судска наредба е историски момент, предвесник на новата правна држава. Вакво нешто досега не се случило во целокупната историја на постоење на македонската современа парламентарна држава, рамно цели 71 година. Јавни обвинители во УБК со судски наредби попречувани во работата од високи државни, партиски и полициски функционери е вест на деценијата која многу кажува уште пред да заврши истрагата. Во вакви мигови на шок, уплав и неверување како тоа некој да се дрзне да чепка по „државните“ тајни кои се прилично приватизирани и злоупотребени веднаш се препознаа партиските наредби и директиви до своите функционери во МВР и до своите новинари во медиумите. По првиот уплав кога Катица Јанева влезе во УБК настапија серија мали и поголеми земјотреси како афтершокови. Дотрчаа каде што не им е местото поранешниот министер на МВР , а сегашен директор на Бирото за јавна безбедност Митко Чавков и знаменитиот заменик-министер и надежен политичар на ВМРО ДПМНЕ Оливер Андонов да и’ објаснат на јавноста дека барањата на Катица Јанева и специјалните обвинители се нестручни и опасни за безбедноста на државата. Овие двајца партиски функционери заедно со своите помагачи направија тешко кривично дело спречување на извршување судски наредби. Толку се исплашени, што почнаа да прават почетнички грешки и да ја деградираат државната институција како што е УБК ставајќи ја над законите, односно јавно и себеси и институцијата за државна безбедност ја разоткрија на очиглед на целата јавност дека е под директна контрола на поединци од врвот на ВМРО-ДПМНЕ.

Сето ова лесно беше достапно од партиските медиуми кои како папагали цело деноноќие ги повторуваа партиските наредби дека истрагата е нестручна, дека нема судски наредби, па потоа дека има, дека се заканува опасност од откривање државни тајни и уште милион лаги и дезинформации.

Катица Јанева и специјалните обвинители и потпишаните судски наредби од Весна Димишкова ги изненадија партиските разузнавачи со својата храброст и истрајност да се почитуваат законските овластувања и судските наредби. Беше тоа долга ноќ на исчекување и вистинска војна на нерви во просториите на УБК со многу директни попречувања на истрагата. Но ќе мора едно по едно да се извршуваат барањата на судијата и на Специјалното обвинителство, односно да се прифатат судските наредби. Сега дилемата е дали тоа што сакаа да го скријат партиските функционери во МВР успееја да го направат станувајќи учесници во нови кривични дела, или сепак се обезбедени потребните докази кои ќе ја откријат целата вистина за прислушуваните разговори, односно за голем број злоупотреби во најчувствителната безбедносна институција на Република Македонија какава што е УБК, претворена во партиска филијала на ВМРО-ДПМНЕ.

Судиите и јавните обвинители, истражните органи кои имаа храброст да го отворат овој историски процес на владеење на правото мора да ја добијат целосната поддршка на правните експерти и авторитети во земјата, на медиумите и на слободоумната јавност. Ова навистина е голем историски настан, еден по еден сите од недопирливите кои се огрешиле од законите да се соочат со правдата. Ако власта успее да го попречи овој процес, тоа ќе биде најголемата загуба во определување на иднината на Македонија и нејзините граѓани. Мора да стане совршено јасно дека кога безбедносните и полициските структури во една држава спречуваат судски наредби тоа е крај на државата и зацврстување на престолот на мафијата. Тоа граѓаните на Македонија нема да го дозволат. По 11 декември Специјалното обвинителство ќе има и свој суд и свои полициски сили. По 11 декември и редовното јавно обвинителство и судовите ќе бидат ослободени од партиските стеги. Тоа нема да се случи поради опозицијата и политичката борба за власт, туку само поради иднината на Македонија. Злоупотребите и криминалот на власта веќе се осознаа во секоја куќа.

(Објавено во Утрински)

Нема коментари

Tags:

И криминалците се невини

Објавено на 20 October 2016 од erizaov

vmro-kriminalci

Смешно и мачно, трагикомично што би рекле театролозите е да се гледаат деновиве високите функционери на ВМРО-ДПМНЕ и нивните следбеници како проповедаат дека и криминалците се невини додека не бидат осудени. Да плачеш од среќа и да ти е милина да ги слушаш кога големите демократи зборуваат ораторски разложно дека секој е невин додека не се докаже спротивното, односно неговата вина. Тие што ја попречуваат правдата без срам и перде велат, нема пресуди, нема виновни. Тој што тужи треба да ја докаже на суд вината, а не тој што е обвинет. Така е отсекогаш во светот каде што владее правото и кај што работат судовите, ама не кај нас каде што власта е апсолутна и без никаква контрола цела деценија.

Лажно набедените властелини вчера откриле кое е елементарното човеково право и темелот на вистинските парламентарни демократии каде што правдата се дели во независни судови од независни судии според закон кој подеднакво важи за сите граѓани.

Новите испилени легалисти, тазе преправени почитувачи на законите и човековите права и слободи, набрзина научија што е тоа пресумпција на невиност и колкава неправда им се нанесува на луѓето од владејачкиот естаблишмент ако лесно од око и по автоматизам судиите ја одредуваат мерката притвор. Казаматскиот притвор во „Шутка“ е резервиран само за политички противници, шпиони, предавници и ситни криминалци. Малку грешат во изговорот кога велат пресумпција, но сепак, нивната загриженост за владеење на правото би требало да се почитува само во случај ако вчера сте паднале од Марс директно во Македонија. Паничната повика за заштита на невиноста на високите владини и партиски функционери додека нема конечна судска пресуда кај мене предизвикува бура од смеење, која обично завршува со гадливост и нагон на повраќање.

Какава бре пресумпција на невиност кога за десет години испративте во затвор стотици луѓе со телевизиски камери и со медиумски фанфари и труби, со јавни обвинувања на министри и обвинители пред да се спроведе каква било истражна или судска постапка. Ги прогласивте за виновни во медиумите, а потоа експресно со нарачки им одредивте робијашки долг притвор за да завршат во затвор невини луѓе осудувајќи ги на драконски затворски казни. За каква пресумпција на невиност зборуваат предизборните агитатори на власта кога жигосаа стотици луѓе како кодоши без да им се даде правото на одбрана, без да бидат сослушани. Формираа преки суд божем за просветлување на општеството во кој на криминален начин арогантно противзаконски и противчовечки се компромитираа заслужни дејци и основачи на првата македонска држава и на македонската култура и литература. Лустрацијата од првиот момент од идеја до реализација е прифатена и спроведена не за рехабилитација на жртвите на кодошите и нивно оневозможување повторно да дојдат до високи позиции, туку само за политичка пресметка со неистомислениците и политичките противници. Направија од Македонија сеирџиска судница во која се фалсификуваше нејзината историја сместувајќи ја во исти кош барабар со комунистичките режими на Исток, зад „железната завеса“.

Каква пресумпција на невиност бараат тие што затвараат новинари и медиуми поради напишани текстови, шпионажа и ТВ-емисии судејќи ги на долгогодишни затворски казни без ниту еден доказ.

Тие што ја попречуваат правдата и се ставаат над законите од позиција на сила и моќ немаат право на пресумпција на невиност. Во правните држави тоа е тешко кривично дело, но ретко се применува бидејќи е незамислива ситуацијата политичар да ја попречува истрагата со каква било активност, ниту со најмал збор или асоцијација која може да прозвучи како притисок на истрагата, или попречување на правдата. Во тој миг неговата политичка кариера завршува, а судот има механизми и за максимални казни на тие што треба да служат за пример, а ги кршат законите и се носители на организиран криминал и коруптивни зделки. Тие што не ги признаваат моралните и законските норми не можат да бидат третирани како невини бидејќи ги стопираат истрагите и на Специјалното јавно и на редовното јавно обвинителство кое со години е под целосна политичка контрола. Не можат да бидат прогласени за невини тие кои ја сатанизираат како непријателска и предавничка институцијата за која дале согласност да се формира и изгласале закон во парламентот по кој треба да работи Специјалното јавно обвинителство. Тие што се чувствуваат невини одамна сами ќе побараа судска разрешница ако не се огрешиле од законите и ако навистина е сечено, лепено и монтирано како што не лажеа со месеци за тоа што сите јавно го слушнавме.

Кризата не се разрешува ни со избори на кои главни предводници се високи функционери осомничени за криминал, ни со попречување на правдата. Ако се имаше малку морал и образ, а да не зборуваме за патриотизам, оставката на Никола Груевски од премиерската и од партиската функција одамна ќе ја надминеа кризата која тие ја создадоа со своето криминално владеење цели десет години.

Ете затоа е лесно препознатливо зошто високи функционери на власта зборуваат на цел глас за заштита на невиноста и за владеење на правото додека истовремено ја попречуваат правдата и не го признаваат ниту судот под нивна контрола.

Ова е само уште еден доказ дека последното прибежиште на криминалците е во патриотизмот и популизмот.

(Објавено во Утрински)

Нема коментари

Tags:

Размислете барем една минута

Објавено на 19 October 2016 од erizaov

izbori glasanje

Познатиот американски интелектуалец и жесток критичар на американската политика Ноам Чомски пред едни претседателски избори им се обрати на Американците со апел да одвојат од своето време барем 10 минути и да размислат на кого ќе му го дадат својот глас. Молбата на Чомски во првото читање се доби впечаток дека беше мотивирана од значењето на изборот на претседател на САД. Клучната порака сепак е во второто читање и во минутажата, само 10 минути, колку е доволно да се мисли за избор на најмоќниот човек на светот, претседател на најголемата воена и економска сила на планетата Земја.

Си велам, ако Чомски смета дека Американците вреди да размислат 10 минути на кого ќе му ја дадат довербата да владее со Америка и безмалку со светот, колку ли им треба на Македонците да размислат на кого ќе му ја дадат власта која во Македонија е неограничена и без институционална и законска контрола. Мислам дека нема да бидам малициозен ако кажам дека е доволно да се размисли само една минута, а најчесто ни толку. Единствен услов е да се мисли со своја глава, ако е тоа е можно во држава во која граѓаните живеат цела деценија под стрес и страв од постојаната предизборна кампања со силна пропагандна агресија врз сите сетила на луѓето, животните и растенијата што се’ уште виреат и егзистираат во Македонија. До 11 декември вреди да потрошиме една минутка сами да мислиме за својата иднина и на своите деца и потомци. Чинам нема да ни биде тешко откако поарчивме бадијала цела деценија и 20 милијарди евра наши пари и влеговме до гуша во борчови.

Колку секунди ни требаат да осознаеме дека не треба да гласаме за луѓе осомничени за криминал, корупција, местење избори, уништување туѓ имот, брутална пресметка со политички противници… Колку време треба за да укапираме дека политичари против кои се водат истраги, а се на врвот на власта не само што не можат да го добијат нашиот глас, без оглед на која партија, нација и вера припаѓаме, туку според елементарните мерила на одговорност не можат да учествуваат на избори додека не се соочат со правдата и не ни покажат судска тапија дека се невини.

Колку време ни треба да ни текне зошто тие што владеат десет години со Македонија, а се невини, лажно наклеветени и набедени ја попречуваат правдата и не сакаат да излезат пред судот кој е под нивна контрола. Зошто го сакаат повеќе нашиот глас како ослободителна пресуда отколку судската ослободителната пресуда на поротниците, судијата и судот. Колку време ни треба да разбереме дека нема ништо поздраво за едно болно општество со години во криза од промената на власта. Или колку време ни треба да се сетиме што се’ ќе излезе на виделина кога ќе си замине една улежена и арогантна власт која се одржува цела деценија со лаги, и баснословни заеми дома и во светски банки, осомничена и под истрага за дебела корупција и организиран криминал. Колку време ни треба да откриеме кои стратегиски цели и приоритети на државата остварија големите реформатори и патриоти за цела една деценија. Дали се тоа спомениците и вртелешките, или мостовите на Вардар што не водат никаде, дали се тоа рајските градини и жални врби, или се тоа корабите и галиите заринкани со бетон и челик длабоко под нивото на Вардар, дали се тоа барокните и рококо гаражи на кои ни се смее светот, дали е тоа новата лажна историја која ни ја прикажуваат како славно минато со интервенција на политиката во науката. Дали е тоа нашето замрзнато членство во НАТО и во ЕУ, дали е тоа подобриот животен стандард на граѓаните од кои стотина илјади гладуваат и еден милион живеат во голема сиромаштија , дали се тоа над сто илјади млади и стручни луѓе што заминале легално од Македонија со македонски, бугарски и туѓи пасоши, а колку стотини илјади наши луѓе живеат нелегално по светот постојано под уплав да не бидат откриени и вратени во земјата безнадежија. Колку време ни треба да откриеме дека тие што на цел глас се фалат и лажат не ни даваат пензии, туку дека тоа се наши пари тешко заработени со повеќедецениска работа. Најголемиот дел од тие пари што сме ги издвоиле од секоја плата ни се украдени во името на лажна солидарност. Не е солидарност кога некој ќе ви земе најмалку 50 отсто од парите што сте ги издвојувале цел работен век. Тоа е грабеж од кој власта си прави пропаганда на милосрдна сестра. Колку време треба да дознаеме дека државната каса е наша, а не нивна, дека заемите што ги земаат меѓу другото за редовна и предизборна корупција ќе ги враќаме ние и нашите деца. Колку време ни треба да дознаеме дека цели десет години се враќаме назад дека сите комшии кои беа зад нас сега се пред нас. Колку време ни треба да научиме дека слободата, човековите права, демократијата, владеењето на правото, човековата природна средина, независноста на медиумите се основните предуслови за здраво општество и парламентарна демократија по урнек на западноевропските земји, а ние останавме и без одамна стекнатите и освоени основни цивилизациски стандарди. Уште колку време ни треба да разбереме зошто некој има силна потреба постојано да открива предавници, непријатели, кодоши и шпиони редовно меѓу политичките неистомисленици и критичари на владините политики. Кој и зошто постојано измислува заговори на големите сили и опасност од граѓански војни, меѓуетнички и меѓуверски судири. На здраворазумен и слободоумен човек за сето ова да му стане кристално чисто и јасно не му треба ни една минута. На клиентите и на тие што добро се нафатирале на јаслите на власта не им треба ни една минута бидејќи тие добро знаат дека промената на власта ќе ги остави без привилегии и без заштита од соочување со правдата.

(Објавено во Утрински)

Нема коментари

Tags:

Не го даваат Никола

Објавено на 17 October 2016 од erizaov

gruevski-miting

Во неделата наутро „Илинденска“ никогаш не била поубава, или можеби мене така ми се виде оти беше празна. Измиена од дождот, без ниту еден автомобил на неа блескаше есенското сонце почнувајќи од Владата, па дибидус се’ до спортската сала „Борис Трајковски“. Полицијата ме пропушти да поминам, возев по празен булевар во прекрасна тишина, се чувствував привилегиран. Завртив цел круг по двете ленти, на сите семафори им кренав рака на полицајците небаре сум им шеф, ми отпоздравија, давајќи ми знак да продолжам. Си реков, сигурно мислат дека сум некој значаен од власта штом ми дозволија слободно да се движам по знаменитата скопска улица која од сончева авенија наутро, до попладнето стана „булевар на мракот“ и паркинг на к’рнтии од автобуси.

Само што ја испив првата голтка кафе во кафетеријата карши гимназијата „Орце Николов“ кога наиде првата голема колона луѓе кои врвеа молкум. Да не беа развеаните знамиња што ги носеа, човек може да помисли дека е некоја тажна поворка, како на некој погреб. И баш во тој миг силно одекна од стотици грла „Никола не го даваме, Никола не го даваме, Никола не го даваме…“ Што викаат, ме прашува човекот од соседната маса. Му велам зар не слушаш и му повторувам, Никола не го даваат. Да, да тоа убаво го слушам, ми возврати цинично човекот, ама не разбирам, кој сака да го земе Никола. Не знам, велам, ќе чуеме вечер на Сител, веројатно мислат на домашните непријатели и предавници кои сакаат да му судат на спасителот, или пак мислат на Америка, на ЦИА, на Сорос, на Брисел и другите европски и белосветски курви и џандари… па и јас знам да бидам саркастичен. Нели. Кој суд прашува човекот и сам си одговара, па судот е негов сосе судии, обвинители и адвокати. Америка, ЦИА и Брисел да сакаа досега ќе го кутнеа сто пати… Извините, му велам, да не сте вие Џорџ Сорос преправен во скопјанец. Да, вели, јас сум… што ќе се напиете…

И се разбира, додека луѓето уште ги плакнеа своите очи по излозите на „Сити мол“, големиот трговски центар, и ги бараа автобусите да си заминат пресреќни дома по еднодневниот излет во главниот град, ревносните медиуми го објавија историскиот говор на Никола Груевски, бившиот и идниот премиер, сеедно, кој десет години владее без контрола. И баш како што не беше тешко да се претпостави, Груевски најави нова среќна ера за граѓаните на Македонија, уште подобра, поубава и побериќетна од оваа што ја преживеавме во изминатата деценија. Перикле се враќа во царската резиденција со волја на народот и со 63 пратеници колку што си нарача. Тоа ќе биде крај на кризата. Какви судови, тужби, специјални обвинителства, криминал, корупција, прислушувани и монтирани телефонски разговори и слични глупости. Кога ќе седне кралот на тронот готово е, од сето тоа нема да остане ништо. Судот на народот е најдобриот и единствениот судија. Ако народот каже нема криминал во врвот на власта, тогаш нема, ако народот каже нема корупција во врвот на ВМРО-ДПМНЕ, тогаш навистина нема… ако народот каже власта е најчесна во Европа бидејќи само во Македонија не е откриен ниту еден корумпиран политичар од највисокото раководство, тогаш што има да се поднесуваат тужби од странски инсталации и непријатели.

Во владите на Груевски и во врвот на ВМРО-ДМНЕ нема ниту една злоупотреба на власта, ни помисла на криминал, или коруптивна зделка, ниту еден сомнителен тендер, или какво било оштетување на државата. Не е регистриран ниту еден случај на корупција и криминал, ниту пак некој од врвот е осуден. Ако не верувате, прашајте го лично јавниот обвинител Марко Зврлевски, тој лично ќе ви потврди дека за десет години чесно се потрошија над 20 милијарди евра буџетски пари на граѓаните без никој да ги излиже прстите од медот. Тоа ти се вика чесна и поштена власт, поради која државната антикорупциска комисија остана без работа, како и судот за организиран криминал. Цели десет години мораа да се занимаваат само со криминалците во опозицијата и разни шпиони, кои измислија телефонски разговори и предизвикаа невидена криза. Тоа на митингот го кажа и Никола Груевски потврдувајќи по илјадити пат дека опозицијата ја „вовела државата во невидена криза и на раб на внатреетнички, но и можност за меѓуетнички конфликт. И потоа следува силната патриотска поента: „сакаа да не’ закрват до крај за да може без волјата на народот да дојдат на власт, затоа што така смислиле, но силата и мудроста на овој народ е многупати докажувана низ историјата, трпението на овој народ е неговата најсилна доблест, иако тоа многумина го сметаат за хендикеп… со тоа трпение народот дојде до посакуваната цел: изборите и крај на кризата“.

Ете така смислил Груевски уште една голема ујдурма како јагнињата им ја заматиле водата на волците, па така и опозицијата ја смислила кризата за да предизвика крвопролевање внатреетнички и меѓуетнички судири и конфликти, граѓанска војна и други злодела. Но, за наша голема среќа Груевски е тука од бога пратен да ја спаси Македонија.

Спасителот во своите говори не ги употребува зборовите организиран криминал, корупција, мито, провизија, рекет, злоупотреба на овластувањата, а и нема потреба кога такво нешто нема ни кај него, ниту пак кај неговите најблиски соработници и партнери во поделба на власта. ВМРО ДПМНЕ општо е познато дека е богата политичка партија само поради издашноста на масовното членство кое редовно и штедро со голема љубов кон татковината плаќа партиска членарина, дури и кога не знае за тоа.

Зборовите пак слобода, демократија, човекови права, независни медиуми, владеење на првото, граѓански асоцијации и невладини организации Груевски може да ги спомне во своите јавни настапи само кога сака да ги исмева Брисел и меѓународната заедница бидејќи кај нас има поголема слобода отколку нај нив. Сто пати проверено.

Конечно, одговорот е во прашањето дали ќе одиме на референдумски избори без оглед на партиската, националната и верската припадност за враќање на слободата и владеење на правото, или ќе гласаме за заштита на криминалците кои на очиглед на целата слободоумна јавност бегаат од правдата злоупотребувајќи ја власта и државната каса…

(Објавено во Утрински)

Нема коментари


Photos from our Flickr stream

See all photos

Twitter


календар

October 2016
M T W T F S S
« Sep   Nov »
 12
3456789
10111213141516
17181920212223
24252627282930
31